اباي وبلىسىنىڭ بەسقاراعاي اۋدانىندا اۋىل تۇرعىندارىنىڭ ساۋلىعىن نىعايتۋعا باعىتتالعان ماڭىزدى الەۋمەتتىك نىسان ىسكە قوسىلدى. ەرنازار اۋىلىندا زاماناۋي تالاپتارعا ساي سالىنعان جاڭا دارىگەرلىك امبۋلاتوريا ەل يگىلىگىنە بەرىلدى.
بۇل نىسان – «اۋىلدىق دەنساۋلىق ساقتاۋدى جاڭعىرتۋ» ۇلتتىق باعدارلاماسى اياسىندا جۇزەگە اسقان جوبالاردىڭ ءبىرى. باعدارلاما شەڭبەرىندە اۋدان بويىنشا بارلىعى 11 جاڭا مەديتسينالىق نىساننىڭ قۇرىلىسى اياقتالىپ، پايدالانۋعا بەرىلدى. ونىڭ ىشىندە 4 دارىگەرلىك امبۋلاتوريا، 1 فەلدشەرلىك-اكۋشەرلىك پۋنكت جانە 6 مەديتسينالىق پۋنكت بار.
ەرنازار اۋىلىنداعى امبۋلاتوريا تۇرعىندارعا العاشقى مەديتسينالىق كومەكتى ساپالى ءارى قولجەتىمدى تۇردە كورسەتۋگە مۇمكىندىك بەرەدى. نىساننىڭ ىشىندە فيزيوتەراپيا جانە پروتسەدۋرالىق كابينەتتەر، ورتا بۋىن مەديتسينا قىزمەتكەرلەرىنە ارنالعان بولمەلەر مەن دارىحانالىق پۋنكت جۇمىس ىستەيدى.
جاڭا عيمارات زاماناۋي مەديتسينالىق قۇرال-جابدىقتارمەن تولىق قامتاماسىز ەتىلگەن. مۇندا نەيبۋلايزەر، ەلەكتروكارديوگراف، دەفيبريللياتور، ەكى ارنالى سەنسورلى ماگنيتوتەراپيا اپپاراتى، سپيرومەتر، سونداي-اق جوعارعى تىنىس الۋ جولدارىن ۋلتراكۇلگىن ساۋلەمەن ەمدەۋگە ارنالعان ستاتسيونارلىق قۇرىلعى ورناتىلعان.
مۇنداي يگى باستامالار شالعاي اۋىلدارداعى تۇرعىندارعا ساپالى مەديتسينالىق قىزمەتتىڭ قولجەتىمدىلىگىن ارتتىرىپ، اۋىلدىق دەنساۋلىق ساقتاۋ جۇيەسىنىڭ دامۋىنا سەرپىن بەرەدى.
ايتا كەتەيىك، رەسپۋبليكا كۇنى مەرەكەسىنە وراي بەسقاراعاي اۋدانىنىڭ بەلوكامەنكا جانە ستەكليانكا اۋىلدارىندا دا جاڭا مەديتسينالىق پۋنكتتەر اشىلعان بولاتىن.
