Eńbekpen kelgen tabys, mansaptaǵy órleý, ujymnyń qurmetine bólený, turaqty eńbekaqy men laıyqty demalys – munyń barlyǵy adal eńbektiń nátıjesi. Qazaqstanda eńbekqor, isine berilgen jandardy qurmetteý maqsatynda Eńbek kúni atap ótiledi. Bul mereke bıyl Abaı oblysynda da keń aýqymda uıymdastyrylyp, kásipkerler kórmesi men bos jumys oryndarynyń jármeńkesi ótti.
Besqaraǵaı aýdanynan kelgen kópbalaly ana, kásipker Shuǵyla Káripova óz isin damytý úshin memleketten grant alyp, búginde sút ónimderin óndirýmen aınalysýda.
– Qazirgi ýaqytta qurt pen maı jasap, satylymǵa shyǵaryp otyrmyn. Turaqty tabys bar. Osyndaı múmkindikter usynǵan memleketke alǵysym sheksiz. Barshańyzdy Eńbek kúnimen quttyqtaımyn! – dep Shuǵyla Káripova óziniń qýanyshymen bólisti.
Bos jumys oryndarynyń jármeńkesine Ulttyq gvardııa ókilderi de qatysyp, áskerı bólimderde bos oryndar bar ekenin habarlady.
Eńbek mobıldiligi ortalyǵynyń dırektory Erkebulan Tursyn Abaı oblysynyń birneshe aýdandarynan kelgen kásipkerlerdiń de belsendilik tanytyp otyrǵanyn atap ótti.
– Búgingi jármeńke Eńbek kúnine arnalǵan. Oǵan 29 kásiporyn men uıym qatysyp, 300-ge jýyq bos jumys ornyn usyndy. Sonymen qatar, 2023-2024 jyldary memlekettik grant alǵan kásipkerler de óz ónimderin arnaıy kórmege qoıdy. Kórmege Besqaraǵaı, Aıagóz, Jarma, Abaı, Borodýlıha aýdandarynyń kásipkerleri qatysyp otyr, – dedi Erkebulan Tursyn.
Jármeńkede iri kásiporyndar da boldy. Olardyń qatarynda «Qarajyra» AQ, «Daewoo Bus Kazakhstan» JShS, «SemAZ» JShS, «Qazaq Astyq Group» JShS, «Semeı ement zaýyty» JShS, «Shyǵys Broıler» JShS, «Semeı qurylys materıaldary» JShS sııaqty belgili mekemeler bar.
Borodýlıha aýdanynyń Novopokrovka aýylynyń turǵyny Rysqaısha Oljaeva da memleketten grant alyp, mal sharýashylyǵyn damytyp keledi. Kásipker óziniń ónimderin jármeńkede kópshilikke usyndy.
– Búgin Eńbek kúninde ónimderimizdi jurt nazaryna usynýdamyz. Aýyl sharýashylyǵy – eńbekqorlyqty talap etetin sala, erte turyp, kesh jatamyz. Osyndaı sharalardy jıi ótkizip tursa degen tilegim bar. Men memleketten grant alyp, mal satyp alyp, sharýashylyǵymdy damyttym. Barsha qazaqstandyqtardy Eńbek kúnimen quttyqtaımyn! – dep óz oıyn qorytyndylady kásipker.
Eńbek kúnine arnalǵan merekelik sharalar munymen shektelmedi. Semeı qalasynyń ónerpazdary avtobýs júrgizýshileri men kondýktorlardy erekshe quttyqtap, qoǵamdyq kólikte án shyrqap, jolaýshylardyń da kóńilin serpiltti. Sonymen qatar, blogerler shaǵyn chellendj uıymdastyryp, eńbekqor semeılikterge – óz isiniń mamandaryna kofe men shokolad syılap, olardyń eńbegin joǵary baǵalady.
Posmotret etý pýblıkaııý v Instagram
