اقمولا وبلىسىنىڭ تۇرعىنى تاسجولعا شاعىن ۇشاق قونعانىن ۆيدەوعا ءتۇسىرىپ العان. كەيىننەن ۇشاقتىڭ نەگە جول بويىنا تۇراقتاعانى انىقتالدى، دەپ حابارلايدى "ادىرنا" ۇلتتىق پورتالى.
جەلىدە تاراعان ۆيدەودا ستەپنوگورسكىدە، ساياجايعا بارا جاتقان جولدا ۇشاقتىڭ قونعانى كورسەتىلگەن.
"ۇشاق ءدال جولعا قوندى. قاراما-قارسى كولىكتەر بولماعانى جاقسى بولدى", - دەدى ۆيدەوعا ءتۇسىرىپ تۇرعان ادام.
ۇشاقتىڭ جول بويىنا نە سەبەپتى قونعانى كەيىننەن ءتۇسىندىرىلدى.
اۋەسقوي-ۇشقىش ستەپنوگورسك قالاسىنىڭ ماڭىندا تاس جولعا كۇتپەگەن جەردەن قونعان.
«10 قىركۇيەكتە اۋەسقوي ۇشقىش جالپى اۆياتسيانىڭ TL-2000 جەڭىل اۋە كەمەسىمەن ۇشىپ بارا جاتىپ، ستەپنوگورسك قالاسىنىڭ ماڭىنداعى از قولدانىلاتىن اۆتوجولدىڭ ۋچاسكەسىنە قوندى»، – دەپ حابارلادى ازاماتتىق اۆياتسيا كوميتەتى (ااك) كازتاگ-تىڭ ساۋالىنا جاۋاپ رەتىندە.
كوميتەتتىڭ ايتۋىنشا، جولعا قونۋ ارەكەتى ىلعالدى توپىراقتى الاڭعا قونۋ مۇمكىن بولماعاندىقتان جاسالعان. قىسقا ۋاقىتتان كەيىن اۋە كەمەسى بازالىق اەرودرومعا قايتا ورالعان.
بۇل ارەكەتتە پيلوتتىڭ اۋەدەن تاڭدالعان الاڭدارعا قونۋعا قاجەتتى دايىندىق دەڭگەيىنىڭ بولماۋىنا قاتىستى زاڭ بۇزۋشىلىق بەلگىلەرى بار ەكەنى اتاپ ءوتىلدى.
"وسى وقيعانىڭ بارلىق جاعدايلارىن مۇقيات زەرتتەگەننەن كەيىن، «قازاقستاننىڭ اۆياتسيالىق اكىمشىلىگى» اق مەن ازاماتتىق اۆياتسيا كوميتەتى جالپى اۆياتسيانىڭ بۇل پايدالانۋشىسىن زاڭنامادا كوزدەلگەن جاۋاپكەرشىلىككە تارتۋ شارالارىن قابىلدايتىن بولادى", - دەلىنگەن رەسمي دەرەككوزدە.
مەملەكەتتىك ورگاننىڭ جاۋابىنا قاراعاندا، بۇل اپاتتى قونۋ بولماعان، ءتىپتى ۇشاق 20 مينۋتتان كەيىن ۇشىپ كەتكەن.
ءوز كەزەگىندە كولىك پروكۋراتۋراسى مەن كولىك پوليتسياسىنىڭ دەپارتامەنتى بۇل وقيعاعا قاتىستى پيلوتتىڭ جاۋاپقا تارتىلاتىندىعى تۋرالى ناقتى جاۋاپ بەرمەدى.
