ۋكراينا پرەزيدەنتى ۆلاديمير زەلەنسكي وتىرعان ۇشاق مولدوۆادان نورۆەگياعا ۇشىپ شىعۋ كەزىندە درونمەن سوقتىعىسا جازداعان. بۇل تۋرالى 9 قىركۇيەكتە نورۆەگيانىڭ پرەمەر-ءمينيسترى يوناس گار ستيورە مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، زەلەنسكيدىڭ ۇشاعى مولدوۆادان ۇشار الدىندا درون قاۋپىنە بايلانىستى كىدىرتىلگەن. كەيىن نورۆەگيا پرەمەر-ءمينيسترىنىڭ كەڭسەسى مولدوۆا اۋە كەڭىستىگىندە دروندارعا قاتىستى قاۋىپ بولعانىن راستادى. الايدا درونداردىڭ پرەزيدەنت ۇشاعىنا قانشالىقتى جاقىن بولعانى بەلگىسىز.
DW باسىلىمىنىڭ دەرەگىنشە، زەلەنسكيدىڭ ۇشاعى كيشينەۆ اۋەجايىندا كۇتىپ تۇرعان كەزدە مولدوۆا اۋە كەڭىستىگىنە رەسەيلىك رەاكتيۆتى ۇشقىشسىز اپپارات كىرگەن. وسىعان بايلانىستى ۋكراينا پرەزيدەنتىنىڭ رەيسى كەيىنگە شەگەرىلىپ، وزگە دە اۋە رەيستەرى ۋاقىتشا توقتاتىلعان.
9 قىركۇيەكتە مولدوۆا پوليتسياسى قۇلاعان دروننىڭ تابىلعانىن حابارلادى. مالىمەتكە سايكەس، جەرگە سوعىلعان كەزدە جارىلىس بولىپ، ۇلكەن شۇڭقىر پايدا بولعان. زارداپ شەككەندەر تۋرالى اقپارات جوق.
ۆلاديمير زەلەنسكي 8 قىركۇيەك كۇنى وسلوعا نورۆەگيا كورولى حارالد V-ءتىڭ جەرلەۋ راسىمىنە قاتىسۋ ءۇشىن بارعان. كەيىن ول نورۆەگيا پرەمەر-مينيسترىمەن كەزدەسكەن. الايدا تاراپتاردىڭ رەسمي حابارلاماسىندا درون وقيعاسى تۋرالى ايتىلماعان.
