عالىمدار COVID-19 ىندەتى باستاۋ العان جەردى انىقتادى. بۇل تۋرالى امەريكالىق Cell عىلىمي جۋرنالىندا جاريالانعان ماقالادا ايتىلعان، دەپ حابارلايدى “ادىرنا” ۇلتتىق پورتالى.
اقپاراتقا سايكەس، اقش، ۇلىبريتانيا، فرانتسيا جانە باسقا ەلدەردەن كەلگەن عالىمدار توبى كوروناۆيرۋستىڭ تارالۋ كوزى قىتايدىڭ ۋحان قالاسىنداعى تەڭىز ونىمدەرى ەكەنىن دالەلدەدى.
«حۋانان بازارى 12 ميلليوننان استام حالقى بار ۋحان قالاسىنداعى ەڭ ۇلكەن جابايى تابيعات بازارى جانە ءتورت تۇراقتى ءتىرى جانۋارلار بازارى بولدى. 2019 جىلدىڭ كۇزىندە بىرنەشە ساتۋشى ءتىرى جانۋارلاردى زاڭسىز ساتقانى قۇجاتتالعان. ەنوت، بامبۋك ەگەۋقۇيرىقتارى، مالايا كىرپىلەر، امۋر كىرپىلەرى مەن ازيالىق بورسىقتار بازاردىڭ باتىس قاناتىندا ورنالاسقان، بازاردىڭ سول بولىگىندە COVID-19 ينفەكتسياسىنىڭ ەڭ ەرتە جانە ەڭ كوپ سانى تىركەلگەن»، – دەلىنگەن حابارلامادا.
سونىمەن قاتار، بازاردان الىنعان گەنەتيكالىق ماتەريالدىڭ ۇلگىلەرىن زەرتتەگەننەن كەيىن ولاردىڭ كوروناۆيرۋستىڭ ورتاق گەنەتيكالىق سيپاتتامالارىنا سايكەس كەلەتىنى انىقتالدى. جانۋارلار ۇستالاتىن تورلاردان، ولاردى تاسىمالداۋعا ارنالعان اربالاردان جانە كاناليزاتسيالىق ارنالاردان كوروناۆيرۋس ىزدەرى تابىلعان. الىنعان ۇلگىلەر بۇكىل پاندەميانىڭ ورتاق گەنەتيكالىق تۇرىمەن ۇيلەسىمدى بولدى.
عىلىمي جۋرنال جاريالاعان مالىمەتكە سايكەس، عالىمدار ۆيرۋستىڭ تارالۋىنىڭ ەكى گيپوتەتيكالىق نۇسقاسىن سيپاتتايدى: جانۋارلاردان (ناقتى قانداي ءتۇردى انىقتاۋ مۇمكىن بولمادى) ادامدارعا جۇققان نەمەسە كەرىسىنشە، ادامدار ونى بازارعا اكەلگەن. سونىمەن بىرگە جارقاناتتاردىڭ گەنەتيكالىق ماتەريالى تابىلمادى. ددۇ 2021 جىلى بۇل جانۋارلار ينفەكتسيا كوزى بولۋى مۇمكىن ەكەندىگىن جانە وسى COVID-19 تارالۋىنىڭ ەڭ ىقتيمال ستسەناريلەرىنىڭ ءبىرى ەكەنىن ايتقان بولاتىن.
سونداي-اق، قىتاي كوروناۆيرۋستىڭ زەرتحانادا پايدا بولۋى مۇمكىندىگىن جوققا شىعارىپ، ەلدىڭ بەدەلىن ءتۇسىرۋدى جانە ماسەلەنى ساياسيلاندىرۋدى توقتاتۋدى تالاپ ەتتى.
