ەلىمىزدە 1-13 قىركۇيەك ارالىعىندا كوشپەندىلەر ويىندارى ءوتىپ، شەتەلدەن 597 مىڭ تۋريست كەلدى، دەپ حابارلايدى "ادىرنا" ۇلتتىق پورتالى تۋريزم جانە سپورت مينيسترلىگىنە سىلتەپ.
68 مىڭ ساياحاتشى استانا جانە الماتى حالىقارالىق اۋەجايلارى ارقىلى، 529 مىڭ تۋريست اۆتو جانە تەمىر جول كولىگىمەن كەلگەن.
"شەتەلدىك تۋريستەردىڭ ەلىمىزدە جۇمساعان جالپى شىعىنى: 15,5 ملن اقش دوللارى (7,5 ملرد تەڭگە). الىس شەتەلدەن كەلگەن تۋريستەردىڭ ورتاشا شىعىنى: 1500 اقش دوللارى. كوشپەندىلەر ويىندارىنا كەلگەن تۋريستەردىڭ قازاقستان ەكونوميكاسىنا قوسقان ۇلەسى: 625 000 اقش دوللارى", - دەلىنگەن مينيسترلىك كەلتىرگەن مالىمەتتە.
ال استانادا وتكەن ويىندارعا مەملەكەتتىك بيۋدجەتتەن 5,7 ميلليارد تەڭگە جۇمسالعان.
العاشىندا بيلىك شامامەن 7 ميلليارد تەڭگە جۇمساماق بولعان، بىراق سۋ تاسقىنى سالدارىنان بيۋدجەت قىسقارتىلدى.
ەڭ كوپ تۋريستەر قىتايدان (33 مىڭنان استام), ءۇندىستاننان (6 مىڭنان استام) جانە گەرمانيادان (4 مىڭنان استام) كەلدى.
5-ءشى دۇنيەجۇزىلىك كوشپەندىلەر ويىندارى اياسىندا سپورتتىڭ 21 تۇرىنەن 97 مەدال جيىنتىعى ساراپقا سالىندى. V دۇنيەجۇزىلىك كوشپەندىلەر ويىندارىندا جالپى جۇلدە قورى 253 ميلليون تەڭگەنى قۇرادى.
