الماتى وبلىسى، جامبىل اۋدانىنا قاراستى ۇزىناعاش اۋىلدىق وكرۋگى 5 178 571 تەڭگەگە داۋىس بەرۋ كابينالارىن ساتىپ الماق، دەپ حابارلايدى "ادىرنا" ءتىلشىسى satypalu.gov.kz سايتىنا سىلتەمە جاساپ.
17 قىركۇيەك كۇنى جامبىل اۋدانى اكىمدىگىنىڭ ۇزىناعاش اۋىلدىق وكرۋگى اكىمىنىڭ اپپاراتى "ۇزىناعاش اۋىلدىق وكرۋگىنە (ۇزىناعاش، جاڭاقۇرىلىس، ىنتىماق ەلدى مەكەندەرى) داۋىس بەرۋ كابينالارىن ساتىپ الۋ جانە ورناتۋ" دەگەن تاقىرىپپەن تەندەر جاريالاعان. مەملەكەتتىك ساتىپ الۋ جەڭىمپازى 24 قىركۇيەك كۇنى انىقتالادى.
ۇزىناعاش اۋىلدىق وكرۋگى بيۋدجەتتەن بولىنگەن 5 178 571 تەڭگەگە قانشا داۋىس بەرۋ كابيناسىن ساتىپ الماق بولىپ وتىرعانىن ءبىلۋ ءۇشىن مەملەكەتتىك ساتىپ الۋدىڭ تەحنيكالىق سيپاتتاماسىن اشتىق. وكىنىشتىسى تەحنيكالىق سيپاتتامادا تۇسىنىكسىز ارىپتەر مەن سانداردان باسقا ەشتەڭە جۇكتەلمەگەن. ياعني، تاپسىرىستى ورىنداۋشى داۋىس بەرۋ كابيناسىن قالاي جاسايتىنى، قۇرامىندا بىرنەشە ەلدىمەكەن بار اۋىلدىق وكۋرگكە قانشا كابينا قاجەت ەكەنى جۇمباق كۇيى قالعان.
6 قازاندا قازاقستاندا اەس سالۋ ماسەلەسى بويىنشا رەفەرەندۋم وتەدى. سوندا رەفەرەندۋمدا داۋىس بەرەتىن كابينا ءۇشىن الماتى وبلىسىنىڭ ءبىر عانا اۋىلى بەس ميلليون تەڭگەدەن استام قاراجات جۇمساماق پا؟ بۇل قارجىعا قانشا كابينا ساتىپ الىنباق؟ قازاقستاندا سوڭعى جىلدارى سايلاۋلار ءجيى ءوتتى. بۇرىنعى سايلاۋداعى كابينالار قايدا كەتتى؟
بۇل سۇراقتاردى ءتيىستى مەكەمەگە جولدادىق. ولاردان جەتكەن جاۋاپتى الدا جاريالايتىن بولامىز!
اسىل اباي
"ادىرنا" ۇلتتىق پورتالى
