الماتى وبلىسى جامبىل اۋدانى ۇزىناعاش اۋىلىنداعى ەسكەرتكىشكە نۇقسان كەلتىرگەن ۆاندالدار ىزدەستىرىلىپ جاتىر. بۇل تۋرالى اۋدان اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
بەلگىسىز بىرەۋلەر ۇزىناعاش شايقاسىنداعى جەڭىس قۇرمەتىنە ورناتىلعان ەسكەرتكىشتى ءبۇلدىرىپ، بەيادەپ جازۋ جازعان. اكىمدىپ مالىمەتىنشە، ۆانداليزم سالدارى جەدەل تۇردە جويىلىپ، پوليتسيا تەرگەۋ جۇمىستارىن باستاعان.
«2 ناۋرىز كۇنى ۇزىناعاش اۋىلىندا زيرات اۋماعىنداعى ەسكەرتكىشتەردىڭ بىرىندە ۆانداليزم دەرەگى انىقتالدى. جەرگىلىكتى اتقارۋشى ورگاندار تاراپىنان سالدارىن جويۋ جۇمىستارى جەدەل جۇرگىزىلدى»، – دەپ حابارلادى اكىمدىك وكىلدەرى.
سونداي-اق جەرگىلىكتى بيلىك اتالعان دەرەك بويىنشا قىلمىستىق ءىس قوزعالعانىن مالىمدەدى.
«كىنالى تۇلعالاردى انىقتاۋ جانە ۇستاۋ ماقساتىندا قاجەتتى جەدەل-ىزدەستىرۋ شارالارى جۇرگىزىلىپ جاتىر»، – دەلىنگەن حابارلامادا.
بۇعان دەيىن رەسەيلىك «تۋرانار» Telegram-ارناسى ەسكەرتكىش بەتىندە رەسەي پرەزيدەنتىنە قاتىستى قورلاۋ سيپاتىنداعى جازۋ پايدا بولعانىن جازعان ەدى.
ۇزىناعاش شايقاسى – 1860 جىلدىڭ قازان ايىندا ورىس جاساعى مەن قوقان اسكەرى اراسىندا بولعان شايقاس. شايقاستا ورىس اسكەرى جەڭىپ، رەسەي يمپەرياسىنىڭ جەتىسۋدا ورنىعۋىنا مۇمكىندىك الدى.
