اقتوبەدە 9 جاستاعى بالا اتكەنشەكتەن قۇلاپ، مەرت بولدى، دەپ حابارلايدى "ادىرنا" ۇلتتىق پورتالى.
ءجاسوسپىرىمنىڭ قاتتى سوققىدان باسى جارىلىپ، ومىرتقاسى مەن قابىرعالارى سىنعان. بالا اتكەنشەكتەن قۇلاپ، قايتىس بولدى.
قايعىلى وقيعا 18 قىركۇيەك كۇنى تىركەلگەن. بۇل تۋرالى اقتوبە وبلىستىق پوليتسيا دەپارتامەنتى وكىلدەرى قىلمىستىق ءىس قوزعالعانىن مالىمدەدى.
"كامەلەتتىك جاسقا تولماعان بالانىڭ قايتىس بولۋىنا قاتىستى 306-باپ – "قاۋiپسiزدiك تالاپتارىنا ساي كەلمەيتىن تاۋارلاردى شىعارۋ نەمەسە ساتۋ، جۇمىستاردى ورىنداۋ نە قىزمەتتەر كورسەتۋ" بويىنشا ءىس قوزعالدى. سوتقا دەيىنگى تەرگەپ-تەكسەرۋ امالدارى ءجۇرىپ جاتىر",- دەپ حابارلادى پوليتسەيلەر. قايعىلى جاعدايدى جەدەل جاردەم قىزمەتىنە كورشىلەرى حابارلاعان. "كەشكى ساعات 19:02-دە قوڭىراۋ ءتۇستى. جەدەل جاردەم بريگاداسى ساعات 19:09-دا جەتتى. بالا ەس-ءتۇسسىز بولعان. كورشىلەر العاشقى كومەك كورسەتكەن. مەديتسينا قىزمەتكەرلەرى 30 مينۋت بويى رەانيماتسيالىق كومەك كورسەتتى. ناتيجە بەرگەن جوق. ساعات 19:41-دە ميدىڭ ءبىرجولا سەمۋى تىركەلدى. بالا اشىق باس مي جاراقاتىن العان، باس سۇيەگى، مويىن ومىرتقاسى، قابىرعاسى سىنعان. كەۋدە قۋىسى قىسىلعان",- دەپ حابارلادى اقتوبە وبلىسى دەنساۋلىق ساقتاۋ باسقارماسىنىڭ ءباسپاسوز قىزمەتى.
