قازتالوۆ اۋدانىنداعى سپورت كەشەنىنىڭ قۇرىلىسى اۋدان اكىمىنىڭ حالىقپەن كەزدەسۋىندە ءجيى كوتەرىلىپ جۇرگەن ماسەلەلەردىڭ ءبىرى بولدى. قۇرىلىس جۇمىستارى اياقتالعان سپورت كەشەنى سالتاناتتى تۇردە اشىلدى. نىساننىڭ اشىلۋ سالتاناتىنا وبلىس اكىمى ناريمان تورەعاليۇلى، اۋدان اكىمى اسلانبەك سارقۇلوۆ، وبلىستىق ءماسليحات دەپۋتاتتارى تۇراربەك تىلەمىسۇلى، سامات حامزاۇلى، كپو ب.ۆ. كومپانياسىنىڭ باس ديرەكتورىنىڭ ورىنباسارى مۇحتار مانكەەۆ قاتىستى.
وبلىس اكىمى ناريمان تورەعاليۇلى اۋدان حالقىن جاڭا سپورت كەشەنىنىڭ اشىلۋىمەن قۇتتىقتادى.
— مەملەكەت باسشىسى قاسىم-جومارت توقاەۆ اۋىلدىق جەرلەردە سپورتتى دامىتۋ ماسەلەسىنە توقتالا وتىرىپ: «اۋىلدىق جەرلەردە سپورتتى دامىتۋ – جاستاردىڭ دەنساۋلىعى مەن تاربيەسىنە وڭ اسەر ەتەتىن ماڭىزدى باعىت. سپورت كەشەندەرى مەن الاڭدارىن سالىپ، اۋىل جاستارىن سپورتقا باۋلۋ ارقىلى ءبىز سالاۋاتتى ۇرپاق تاربيەلەيمىز. ءاربىر اۋىلدا سپورتپەن اينالىسۋعا بارلىق جاعداي جاسالۋى ءتيىس. اۋىل سپورتىن دامىتۋ – بولاشاق چەمپيونداردى تاربيەلەۋدىڭ كەپىلى» – دەپ اتاپ وتكەن بولاتىن. سپورت كەشەنىنىڭ قۇرىلىسى ۇزاق ۋاقىت تۇرالاپ قالعانى بەلگىلى. مەن سىزدەرگە سپورت كەشەنىن 2024 جىلى پايدالانۋعا بەرىلەتىنى جونىندە ۋادە بەرگەن بولاتىنمىن. بۇگىن سپورت سالاسىنىڭ دامۋىنا سەپ بولار، اۋداننىڭ الەۋەتىن ارتتىرۋعا ماڭىزى زور نىساندى پايدالانۋعا بەرىپ وتىرمىز. بيىل وبلىسىمىزدا سۋ تاسقىنى ورىن الىپ، اۋدان ازاماتتارى ورال قالاسى مەن وزگە دە اۋدانداردا سۋ تاسقىنىنىڭ الدىن الۋ جۇمىستارىنا بەلسەنە اتسالىسىپ، ازاماتتىق قولداۋ كورسەتتى. سىزدەردىڭ ازاماتتىق ۇستانىمدارىڭىز ءۇشىن العىس بىلدىرەمىن!، — دەگەن ءوڭىر باسشىسى سپورت كەشەنىنە جاڭا اۆتوكولىكتىڭ سەرتيفيكاتىن تابىس ەتتى.
سپورت كەشەنىنىڭ قۇرىلىسىن كپو ب.ۆ. كومپانياسى تاپسىرىسىمەن «AGA Building» جشس جۇرگىزدى. كەشەندە ۆولەيبول، فۋتزال، باسكەتبول ويىندارىنا ارنالعان زال جانە بوكس، دزيۋدو، كۇرەس،جاتتىعۋ زالدارى بار. اتالعان نىساندا اۋىل بالالارىنا ءتۇرلى سپورتتىق سەكتسيالار جۇمىس جاسايدى. سونىمەن قاتار اۋىل تۇرعىندارى دا بوس ۋاقىتىندا سپورتپەن شۇعىلدانۋعا مۇمكىندىك قاراستىرىلاتىن بولادى.
— بۇگىن اۋدان ورتالىعىنداعى ساۋلەتى كەلىسكەن جاڭا عيمارات، سپورت كەشەنى پايدالانۋعا بەرىلىپ وتىر. بۇل حالىقتىڭ كوپتەن كۇتكەن قۋانىشى. وسى كەشەننىڭ سالىنۋىنا قولداۋ كورسەتكەن وبلىس اكىمدىگىنە جانە قاراشىعاناق پەترولەۋم وپەرەيتينگ كومپانياسىنا، مەردىگەرگە اۋدان حالقىنىڭ اتىنان شىنايى ريزاشىلىعىمىزدى بىلدىرەمىن. پرەزيدەنتىمىزدىڭ باستامالارىن تولىعىمەن قولدايمىز، الداعى رەفەرەندۋمدا بەلسەنە قاتىسۋعا ءوز تاڭداۋلارىڭىزدى جاساۋعا شاقىرامىن. مەملەكەت تاراپىنان سپورت سالاسىن، سونىڭ ىشىندە بۇقارالىق سپورتتى دامىتۋعا كوپتەپ كوڭىل ءبولىنىپ كەلەدى. كاسىبي سپورت تۇرىنەن دە ەل نامىسىن قورعاپ، ابىرويىمىزدى اسقاقتاتىپ جۇرگەن جەرلەستەرىمىز بار. بۇگىندە بالالارىمىز جاڭا سپورت كەشەنىندە جاتتىعىپ، ءتۇرلى سپورت سەكتسيالارىنا قاتىسىپ جەرلەسىمىز دانيار ەلەۋسىنوۆتىڭ ءىزىن جالعايتىن مىقتى سپورتشىلار شىعاتىنىنا سەنىمدىمىن. «سپورت – دەنساۋلىق كەپىلى» دەيدى دانا حالقىمىز. اۋدانىمىزدا سپورت سالاسىنىڭ دامۋىنا قولداۋ كورسەتىلىپ، سالا قارقىندى دامىپ كەلەدى. جاڭا سپورت كەشەنى سپورتشىلارىمىزدىڭ جاڭا مۇمكىندىكتەرىنە جول اشادى دەگەن سەنىمدەمىن! قۋانىش قۇتتى بولسىن، اعايىن!، - دەپ سپورت سالاسىنىڭ ارداگەرى ادىلبەك العازيەۆ.
سپورت كەشەنىنىڭ اشىلۋ سالتاناتىندا وبلىس اكىمى ناريمان تورەعاليەۆ، كپو ب.ۆ. كومپانياسىنىڭ باس ديرەكتورىنىڭ ورىنباسارى مۇحتار مانكەەۆ، ەڭبەك ارداگەرى ۋاليوللا ابەشوۆ، ارداگەر سپورتشى ايدىن ەلەمەسوۆ نىساننىڭ لەنتاسىن قيدى.
كازتالوۆ اۋدانى اكىمدىگىنىڭ ءباسپاسوز قىزمەتى
