16 قىركۇيەك كۇنى «Almaty Theatre» تەاترىندا عاسىرعا جۋىق تاريحى بار مۇحتار اۋەزوۆ اتىنداعى قازاق ۇلتتىق دراما تەاترىنىڭ 99-شى ماۋسىمىنىڭ اشىلۋ سالتاناتى ءوتتى. جاڭا ماۋسىم «قوزى كورپەش-بايان سۇلۋ» قويىلىمىمەن اشىلدى، دەپ حابارلايدى “ادىرنا” ۇلتتىق پورتالى.
عاسىرعا جۋىق تاريحى بار تەاتردىڭ جاڭا ماۋسىمىنىڭ وزگە عيماراتتا اشىلۋ سەبەبى، قازىر مۇحتار اۋەزوۆ اتىنداعى قازاق ۇلتتىق دراما تەاترىنىڭ عيماراتىندا جوندەۋ جۇمىستارى جۇرگىزىلۋدە. بۇل تۋرالى مەملەكەت باسشىسى قاسىم-جومارت توقاەۆ «مادەنيەت جانە ونەر قىزمەتكەرلەرى كۇنىنە» وراي وتكەن سالتاناتتى جيىندا مالىمدەگەن ەدى. ونەر ورداسىنداعى جۇمىستاردى تەاتردىڭ 100 جىلدىق مەرەيتويىنا وراي اياقتاۋ جوسپارلانعان.
تەاتر ماۋسىمىنىڭ اشىلۋ سالتاناتىندا ۇيىمداستىرىلعان ءباسپاسوز ماسليحاتىندا مۇحتار اۋەزوۆ اتىنداعى قازاق ۇلتتىق دراما تەاترىنىڭ ديرەكتورى ەركىن جۋاسبەك جاڭا ماۋسىمداعى جوسپارلارىمەن ءبولىستى.
«الماتىنىڭ ماڭىنداعى ەسىك، تالعار، قاسكەلەڭ، ۇزىناعاش، قوناەۆ قالالارىن ارالاپ قويىلىمدار قويامىز. بيىلعى جوسپار – اقتوبە، قوستاناي قالالارىنا بارۋ. جىلدى كورشىلەس قىرعىز ەلىنىڭ استاناسى بىشكەك قالاسىنا گاسترولدىك ساپارمەن اياقتايمىز. قازىر تەاترىمىزدىڭ نەگىزگى عيماراتىندا جوندەۋ جۇمىستارى جاسالىپ جاتقاندىقتان ءبىزدىڭ كوپتەگەن جوبالارىمىز ۋاقىتشا توقتاتىلادى. جاڭا سپەكتاكل شىعارۋ دا الداعى 2 جىلدا توقتايدى. ويتكەنى، ءبىزدىڭ بارلىق جابدىقتارىمىز نەگىزگى عيماراتتا قالدى. سوندىقتان، ءبىز رەپەرتۋارىمىزداعى 70 قويىلىمدى كورەرمەنگە ۇسىنامىز»، - دەدى تەاتر ديرەكتورى.
مۇحتار اۋەزوۆ اتىنداعى قازاق ۇلتتىق دراما تەاترىنىڭ كوركەمدىك جەتەكشىسى ءاسانالى ءاشىموۆ تەاتر ۇجىمى مەن كورەرمەندەردى 99-ماۋسىمنىڭ اشىلۋىمەن قۇتتىقتادى.
«ۇلى تۇلعالار سالعان جولمەن ءبىزدىڭ تەاتر اينىماي ءجۇرىپ كەلە جاتىر دەپ ويلايمىن. ەلىمىزدە 57 تەاتر بولسا، سونىڭ باسىندا تۇراتىن وسى مۇحتار اۋەزوۆ تەاترى. بىزگە، رەپەرتۋارىمىزعا قاراپ بوي تۇزەيدى. سول ءۇشىن بىزدە رەپەرتۋارىمىزدى كۇشەيتۋ ماقساتىندا جاس رەجيسسەرلاردى تاربيەلەپ جاتىرمىز. تەاتردىڭ اشىلۋى قۇتتى بولسىن، بارلىعىڭىزدى قۇتتىقتايمىن”، دەدى ءاسانالى ءاشىموۆ.
جيىننان كەيىن مۇحتار اۋەزوۆ اتىنداعى تەاتردىڭ قويۋشى-رەجيسسەرى الىمبەك ورازبەكوۆتىڭ «رەجيسسەر الىمبەك ورازبەكوۆ» اتتى كىتابىنىڭ تانىستىرىلىمى ءوتتى. رەجيسسەردىڭ ساحنالانعان سپەكتاكلدەرى جيناقتالعان كىتاپتىڭ تۇساۋكەسەر راسىمىنە قازاقستان رەسپۋبليكاسىنىڭ ەڭبەك ەرى ءاسانالى ءاشىموۆ پەن اقىن اقۇشتاپ باقتىگەرەەۆا قاتىستى.
