16 qyrkúıek kúni «Almaty Theatre» teatrynda ǵasyrǵa jýyq tarıhy bar Muhtar Áýezov atyndaǵy Qazaq ulttyq drama teatrynyń 99-shy maýsymynyń ashylý saltanaty ótti. Jańa maýsym «Qozy Kórpesh-Baıan Sulý» qoıylymymen ashyldy, dep habarlaıdy “Adyrna” ulttyq portaly.
Ǵasyrǵa jýyq tarıhy bar teatrdyń jańa maýsymynyń ózge ǵımaratta ashylý sebebi, qazir Muhtar Áýezov atyndaǵy Qazaq ulttyq drama teatrynyń ǵımaratynda jóndeý jumystary júrgizilýde. Bul týraly Memleket basshysy Qasym-Jomart Toqaev «Mádenıet jáne óner qyzmetkerleri kúnine» oraı ótken saltanatty jıynda málimdegen edi. Óner ordasyndaǵy jumystardy teatrdyń 100 jyldyq mereıtoıyna oraı aıaqtaý josparlanǵan.
Teatr maýsymynyń ashylý saltanatynda uıymdastyrylǵan baspasóz maslıhatynda Muhtar Áýezov atyndaǵy Qazaq ulttyq drama teatrynyń dırektory Erkin Jýasbek jańa maýsymdaǵy josparlarymen bólisti.
«Almatynyń mańyndaǵy Esik, Talǵar, Qaskeleń, Uzynaǵash, Qonaev qalalaryn aralap qoıylymdar qoıamyz. Bıylǵy jospar – Aqtóbe, Qostanaı qalalaryna barý. Jyldy kórshiles qyrǵyz eliniń astanasy Bishkek qalasyna gastroldik saparmen aıaqtaımyz. Qazir teatrymyzdyń negizgi ǵımaratynda jóndeý jumystary jasalyp jatqandyqtan bizdiń kóptegen jobalarymyz ýaqytsha toqtatylady. Jańa spektakl shyǵarý da aldaǵy 2 jylda toqtaıdy. Óıtkeni, bizdiń barlyq jabdyqtarymyz negizgi ǵımaratta qaldy. Sondyqtan, biz repertýarymyzdaǵy 70 qoıylymdy kórermenge usynamyz», - dedi teatr dırektory.
Muhtar Áýezov atyndaǵy Qazaq ulttyq drama teatrynyń kórkemdik jetekshisi Asanáli Áshimov teatr ujymy men kórermenderdi 99-maýsymnyń ashylýymen quttyqtady.
«Uly tulǵalar salǵan jolmen bizdiń teatr aınymaı júrip kele jatyr dep oılaımyn. Elimizde 57 teatr bolsa, sonyń basynda turatyn osy Muhtar Áýezov teatry. Bizge, repertýarymyzǵa qarap boı túzeıdi. Sol úshin bizde repertýarymyzdy kúsheıtý maqsatynda jas rejısserlardy tárbıelep jatyrmyz. Teatrdyń ashylýy qutty bolsyn, barlyǵyńyzdy quttyqtaımyn”, dedi Asanáli Áshimov.
Jıynnan keıin Muhtar Áýezov atyndaǵy teatrdyń qoıýshy-rejısseri Álimbek Orazbekovtiń «Rejısser Álimbek Orazbekov» atty kitabynyń tanystyrylymy ótti. Rejısserdiń sahnalanǵan spektaklderi jınaqtalǵan kitaptyń tusaýkeser rásimine Qazaqstan Respýblıkasynyń Eńbek Eri Asanáli Áshimov pen aqyn Aqushtap Baqtygereeva qatysty.
