ۇياڭىزداعى سىردى ساقتاڭىز...

458

 

قۇپيا دەگەن نە؟ ەلگە نەنى ايتۋعا بولادى، ايتىلمايتىن قانداي قۇپيا بولۋى ءتيىس؟ تىزىمگە كوز جۇگىرتكەن ادام بىرازىمەن ەرىكسىز كەلىسەرى ءسوزسىز.

ايتىلماۋعا ءتيىستى ءبىرىنشى قۇپيا – كەلەشەككە قۇرعان جوسپار.

جوسپار تولىققاندى ورىندالمايىنشا ول تۋرالى ءتىس جارماۋ كەرەك. ادامنىڭ كەز-كەلگەن ويى باستاپقىدا ءالجۋاز بولىپ تۇرادى. ونە بويى شۇرىق-تەسىك كەلەدى. كەز-كەلگەن جەرىنەن كىلتيپان تاۋىپ، ىزگى ويدى ويسىراتىپ الۋعا بولادى.

ەكىنشى قۇپيا – قايىرىمدى ىستەر تۋرالى ەشكىمگە ايتپاۋ.

قايىرىمدى ءىس – جەر بەتىندە سيرەك كەزدەسەتىن قۇبىلىس، سوندىقتان ونى كوزدىڭ قاراشىعىنداي ساقتاۋ كەرەك. ءوزىڭىزدى جاقسىلىق جاساعانىڭىز ءۇشىن اسىرا ماقتاماڭىز. ماقتاۋ ادامدى تاكاپپارلىققا تەز ۇرىندىرادى.

ءۇشىنشى قۇپيا – تاقۋالىعىڭىز تۋرالى كوپشىلىكتە ايتپاۋ.

تاماق، ۇيقى، كۇلكى، توسەك قاتىناسىنا قاتىستى شەكتەۋلەرىڭىزدى ەشكىمنىڭ بىلمەگەنى ءجون. ءتاننىڭ شەكتەۋى كوڭىلدىڭ تاقۋالىعىمەن ۇيلەسسە عانا پايدالى.

ءتورتىنشى قۇپيا – جاساعان ەرلىك، باتىرلىق تۋرالى ۇندەمەۋ.

ءار ادام كۇندەلىكتى سان-الۋان وقيعالاردى باستان كەشىرەدى. بىرەۋ بىلەكتىڭ كۇشىمەن جەڭىپ جاتسا، بىرەۋدىڭ اقىلى اسادى. كۇشپەن جەڭگەن ادامنىڭ ەرلىگى تەز باعالانادى. ىشكى ارپالىستى ەشكىم بايقاي بەرمەيدى. سوندىقتان ول ءۇشىن ەشكىم ماراپات بەرمەيدى.

بەسىنشى قۇپيا – رۋحاني جەتىلۋ تۋرالى ايتپاۋ.

رۋحاني بايلىق تەك سىزدىكى. ونى ەشكىمگە ايتىپ ابىروي جيناي المايسىز. اينالاڭىزداعى ادامداردىڭ شىن مۇقتاجدىعىن كورسەڭىز عانا شەت جاعاسىن ايتىڭىز.

التىنشى قۇپيا – ۇيدەگى ۇرىس-كەرىس پەن وتباسىلىق ءومىر تۋرالى ۇندەمەۋ.

ەسىڭىزدە بولسىن: وتباسىڭىزداعى ۇرىس تۋرالى نەعۇرلىم از ايتساڭىز، ونىڭ ىنتىماعى بەرىك بولا تۇسەدى. ۇرىس – ارالاسۋ بارىسىندا جينالىپ قالعان زياندى قۋات. تۇيتكىلدى كوپ تالقىلاعان سايىن وعان ءوزىڭىز كوبىرەك سەنە باستايسىز.

جەتىنشى قۇپيا – باياعىدا ەستىگەن جامان سوزدەر تۋرالى ايتا بەرمەڭىز.

كوشەدە ءجۇرىپ اياقكيىمدى بىلعاپ الۋعا بولادى. ال، كەيدە سانانى دا بىلعاپ الاتىندار بولادى. جولدا كەلە جاتىپ ەستىگەن بار قاڭسىق ءسوزدى ۇيگە كەلىپ ايتقان ادامنىڭ تابالدىرىقتان اتتاپ، بىلعانىش اياق كيىممەن تورگە وزعان ادامنان ايىرماسى جوق.

 

 

"ادىرنا" ۇلتتىق پورتالى

 

پىكىرلەر