الماتىدا 14-15 قىركۇيەكتە الماتى مادەنيەت باسقارماسى جانە قالانىڭ ورتالىقتاندىرىلعان كىتاپحانا جۇيەسىنىڭ قولداۋىمەن «BAURZHAN Foundation» قورى ۇيىمداستىرعان Kitap Fest Almaty كىتاپ فەستيۆالى ءوزىنىڭ ون جىلدىعىن اتاپ ءوتتى، دەپ حابارلايدى “ادىرنا” ۇلتتىق پورتالى.
قالا كۇنى قارساڭىندا مەگاپوليستىڭ ەڭ ءىرى مادەني ءىس-شارالارىنىڭ بىرىنە اينالعان فەستيۆال 2014 جىلى باستاۋ العان بولاتىن.
بيىلعى ەرەكشەلىگى — فەستيۆال 10 جىلدا العاش رەت ەكى كۇن قاتارىنان ءوتتى. «كەلەشەك كىتابى» ۇرانىمەن ءوتىپ جاتقان مەرەيتويلىق فەستيۆال كەلۋشىلەرگە ءتۇرلى باعدارلامالار ۇسىندى.
فەستيۆالدىڭ نەگىزىن قالاۋشى جۇلدىز وماربەكتىڭ ايتۋىنشا، Kitap Fest Almaty كىتاپقا دەگەن سۇيىسپەنشىلىكتىڭ سيمۆولىنا اينالدى.
— كىتاپ — ۇلت رۋحانياتىن دامىتىپ، جاس بۋىندى ىزگىلىككە تاربيەلەۋدە اسا ماڭىزدى رولگە يە. Kitap Fest-ءتىڭ باسقا فەستيۆالدەردەن ايىرماشىلىعى نەدە؟ بىرىنشىدەن، Kitap Fest — قازاقستانداعى جالعىز كىتاپ فەستيۆالى. ەكىنشىدەن، بۇل جاي عانا كىتاپ جارمەڭكەسى ەمەس، ءبىز مادەنيەتتى جانە وقۋعا دەگەن سۇيىسپەنشىلىكتى ناسيحاتتايمىز. ءاربىر كىتاپتىڭ ءوز وقىرمانى بار. سول سياقتى ءار جازۋشىنىڭ دا وز اۋديتورياسى بار. جوبانىڭ ماقساتى وقىرمان مادەنيەتىن دامىتىپ، جازۋشىلار مەن وقىرمانعا كەزدەسۋ الاڭىن ۇيىمداستىرۋ، — دەيدى ول.
فەستيۆالگە 70-تەن استام كىتاپ دۇكەنى مەن باسپالار قاتىستى جانە 50-گە جۋىق جاڭا كىتاپتىڭ تۇساۋى كەسىلدى.
اتالمىش شاراعا شەتەلدىك قوناقتار دا قاتىستى. تۇركيا ەلشىلىگىنىڭ وكىلى ايحان كوركماز مۇنداي ءىس-شارالار ارقىلى مادەني تاجىريبە الماسۋ جانە حالىقارالىق بايلانىستاردى نىعايتۋدىڭ ماڭىزىنا توقتالدى.
