2024 جىلدىڭ العاشقى سەگىز ايىندا تاشكەنت مەشىتتەرىنەن 8 يمام (ۋاعىزشى) مەن ولاردىڭ 10 ورىنباسارى جۇمىستان شىعارىلدى. ولار ءوز قىزمەتىندە قاتەلىكتەر جىبەرىپ، قىزمەتتىك مىندەتتەرىن دۇرىس ورىنداماعان. بۇل تۋرالى وزبەكستان مۇسىلماندارى باسقارماسىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
انىقتالعانداي، ەسەپتى كەزەڭدە وسىعان ۇقساس قۇقىق بۇزۋشىلىقتار ءۇشىن تاعى 4 ءدىن قىزمەتكەرى تارتىپتىك جازاعا تارتىلعان. بۇل ستاتيستيكا وزبەكستاننىڭ ءدىني باسقارماسىنىڭ باسشىسى، ءمۇفتي شەيح نۋريددين حوليكنازاردىڭ توراعالىعىمەن وتكەن ەلوردا يمام-حاتيبتەرىنىڭ سىني-ساراپتامالىق جيىنىندا ايتىلدى.
حوليكنازار تاشكەنت يمامدارىن قاتتى سىنعا الىپ، ولاردىڭ كەيبىرەۋلەرى «نەگىزگى مىندەتىنە نەمقۇرايلى قارامايدى، ءدىندارلاردىڭ مۇڭ-مۇقتاجىن قامتاماسىز ەتۋگە جەتكىلىكتى كۇش سالمايدى، سونداي-اق اتقارۋ ءتارتىبىن بۇزۋعا جول بەرەدى» دەدى.
بولىممەن بەلگىلەنگەن ءتارتىپتى، ەڭبەك شارتىنىڭ تالاپتارىن جانە لاۋازىمدىق نۇسقاۋلىقتاردى ساقتاماعان ءدىن قىزمەتكەرلەرىنە شارا قولدانىلدى.
سونداي-اق، ول بارلىق مەشىت ۋاعىزشىلارىن ءوز قىزمەتتەرىن جەتىلدىرىپ، بىلىكتىلىكتەرى مەن بىلىمدەرىن شىڭداۋعا، شاريعاتقا لايىقتى قىزمەتشىلەر بولىپ، پارىزدارىن «جالىندى ماحابباتپەن، تاقۋالىقپەن جانە قۇلشىلىقپەن» اتقارۋعا شاقىردى.
