الماتى پوليتسياسى جۋرناليست اسحات نيازوۆتىڭ ۇستالۋىنا قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
"وبوجايۋ" YouTube ارناسىنىڭ اۆتورى، جۋرناليست اسحات نيازوۆ ۇستالعان.
ءجۋرناليستىڭ ايتۋىنشا، الماتى اكىمدىگىنىڭ كۇزەتشىسى "عيمارات ماڭىندا كۇدىكتى ادامدار ءجۇر" دەپ راپورت جازعان. نيازوۆتىڭ ۇستالۋىنا قاتىستى پوليتسيا پىكىر ءبىلدىردى.
"كۇدىكتى ادامداردىڭ مەملەكەتتىك قورعاۋعا الىنعان نىساندى ءتۇسىرىپ جاتقانى تۋرالى حابارلاما كەلىپ تۇسكەنىن حابارلايمىز. جەكە باسىن جانە ءىستىڭ ءمان-جايىن انىقتاۋ ءۇشىن ازاماتتار بوستاندىق اۋداندىق پوليتسيا باسقارماسىنا شاقىرىلدى. ءمان-جاي انىقتالعان سوڭ ولار بوساتىلدى", - دەدى الماتى قالالىق پوليتسيا دەپارتامەنتىنىڭ ءباسپاسوز قىزمەتى.
ال جۋرناليست قالا كۇنىنە بايلانىستى ارنايى شىعارىلىم دايىنداپ جاتقانىن حابارلاعان.
"ولاردىڭ مەنى ەكى كولىكپەن، 6-7 پوليتسيا بوپ ىزدەگەنى قاتتى تاڭعالدىردى. ماعان حابارلاسىپ، كەلۋىمدى سۇراسا دا ءوزىم بارار ەدىم. مەن تەك اكىمدى ىزدەپ جۇرگەنىم تۋرالى تۇسىنىكتەمە بەردىم", - دەدى نيازوۆ.
