گەرمانيادا قازاقستاندىق سۋديا جوعالىپ كەتتى، دەپ حابارلايدى "ادىرنا" ءتىلشىسى.
بۇل تۋرالى جۋرناليست گۇلميرا ابىقاي 8 ماۋسىم كۇنى Facebook جەلىسىندەگى پاراقشاسىندا جازدى.
«گەرمانيادا قازاق قىزى جوعالدى! ايگۇل سايلىباەۆا استانا قالاسى سارىارقا اۋدانىنىڭ بۇرىنعى سۋدياسى، «بولاشاق» تۇلەگى. ول كۇيەۋى الەكساندر دونتسوۆپەن بىرگە 2019 جىلى ەلدەن كەتكەن. وزىنەن ءبىراز جاس كىشى، بىرنەشە شەت ەل ازاماتتىعى بار كۇيەۋىمەن الەمنىڭ ءبىراز ەلىندە تۇرىپ كەلگەن. رەسەي، امەريكانى اينالىپ، سوڭعى كەزدە گەرمانيانىڭ بەينشەيم شاھارىنا تۇراقتاعان ەكەن»، – دەپ جازدى جۋرناليست.
جۋرناليست جازباسىندا ايەلدىڭ 4 كۇننەن بەرى ەلدەگى تۋىستارىمەن بايلانىسقا شىقپاعانى جازىلعان. ايگۇلدى باۋىرى قانات سايلىباەۆ ىزدەپ شارق ۇرىپ وتىر. اعاسىنىڭ ايتۋىنشا، بۇرىنعى سۋديا كۇيەۋى مەن ەنەسىنەن شەت ەلدە تۇرمىستىق زورلىق-زومبىلىق كورگەن.
«قازىر بۇل ماسەلەگە ءسىم ارالاستى، بەينشەيم پوليتسياسىنا ارىز بەرىلدى. الايدا، كۇيەۋى ايەلىن كورمەدىم، بىلمەدىمنەن ءارى اسپاي وتىر. ال ەنەسى ناتاليانى نەمىس پوليتسياسىنىڭ ءوزى تاپپاي جاتىر. بەلگىلىسى، ايگۇل مەن الەكساندردىڭ اراسىندا 3 جاسار جاكلين ەسىمدى قىزى بار، ول گەرمانيا ازاماتى. ال كۇيەۋ بالانىڭ كىم ەكەنى، ماماندىعى مەن جۇمىسى، تابىسى، جالپى نەمەن ءومىر سۇرەتىنىنەن قايىن جۇرت ەش حابارسىز ەكەن»، – دەيدى گۇلميرا ابىقاي.
