جەتى بالالى وتباسىنىڭ مۇشكىل ءحالى جۇرەكتى اۋىرتادى - جۋرناليست

جۋرناليست گۇلميرا ابىقاي الەۋمەتتىك جەلىدەگى پاراقشاسىندا شىمكەنت قالاسىندا تۇراتىن كومەككە مۇقتاج كوپبالالى وتباسى تۋرالى جازبا جاريالاپ، قوعامنىڭ نازارىن اۋداردى، دەپ حابارلايدى "ادىرنا" ۇلتتىق پورتالى. گۇلميرا ابىقايدىڭ ايتۋىنشا، بۇل وتباسى تۋرالى الەۋمەتتىك جەلى ارقىلى حابارلاما العان. حابارلامانى وقىعان سوڭ، وتباسىنىڭ جاعدايىمەن تانىسۋ ءۇشىن ءوزى بارىپ قايتقان. كورگەن كورىنىس جۇرەگىن اۋىرتقانىن جەتكىزدى. «گۇلميرا اپاي، بۇلار دا 7 بالا. اتا-اناسى بار بولعانىمەن، جوققا تەڭ. كومەكتەسەيىكشى» دەگەن سمس كەلدى. باردىم… جۇرەگىم اۋىردى. كوردىم… ەندى ەستەن كەتپەي جاتىر", – دەپ جازدى جۋرناليست. جۋرناليست بايانداعانداي، وتباسىنىڭ 7 بالاسى بار، ۇلكەنى 10 جاستا، كەنجەسى – 2-دە. بالالاردىڭ اتا-اناسى – جارىمجان. اكەسى مانسۇر بەلىنەن جۇرە المايدى، ءبىر قۇلاعى ەستىمەيدى. اناسى ءزۇلفيانىڭ دا ءبىر قۇلاعى ءتۋابىتتى جوق، قالقانشا بەزىنىڭ اۋرۋى اسقىنىپ، دەنساۋلىعى كۇرت ناشارلاعان. وتباسى مەملەكەتتەن اتاۋلى الەۋمەتتىك كومەك (ااك) المايدى، اكەسىنە مۇگەدەكتىك بەرىلمەگەن. "مانسۇر 500 مىڭ تەڭگەگە نەسيە الىپ، جەر ساتىپ العان. ۆرەميانكا سالىپ، ءۇيىن كەڭەيتىپ جاتقاندا بيىكتەن قۇلاپ، بەلىن سىندىرعان. وتا جاساتپاسا بولمايدى، بىراق وعان شامامەن 2 ميلليون تەڭگە قاجەت. ال ولاردا ءتىپتى جەكە قۇجاتتى جوندەۋگە دە قاراجات جوق", – دەدى جۋرناليست. گۇلميرا ابىقاي بۇل وتباسىعا قاتىستى ەشقانداي سىن ايتپاي، تەك شىن جانى اشىعان جانداردى كومەك قولىن سوزۋعا شاقىردى. ول اسىرەسە، كوپبالالى جانە دەنساۋلىعى ناشار جانداردىڭ مەملەكەت تاراپىنان ەسكەرۋسىز قالىپ جاتقانىنا الاڭداۋشىلىق ءبىلدىردى. "ەڭ قۇرماسا باستاعان ءۇيىن اياقتاسىن. بالالاردىڭ ناسىبىنە بالكىم باسپانا بۇيىرار", – دەيدى جۋرناليست.