سىر-الاشتىڭ اناسى!

2467
Adyrna.kz Telegram

“تۋعان جەر” شىعارماشىلىق بايقاۋىنا قاتىسۋشىلاردىڭ تۋىندىلارىن پاراقشامىزعا جاريالاۋدى باستادىق.  بايگەنىڭ "پوەزيا" اتالىمى بويىنشا كەلەسى قاتىسۋشىسى: شالباي اياجان كولدەيبەكقىزى

اۆتور: شالباي اياجان كولدەيبەكقىزى
بايلانىس تەلەفونى: 87714212500

 

جىرىم بولسىن سىر ەلىمە ارنالعان،
مەن قىزىڭمىن ۇلى ونەردى جالعاعان.
التى الاشقا پانا بولعان جىر ەلىم،
تىنىم تاپپاي كوككە بيىك سامعاعان.

التىن وردام – قىمباتسىڭ،بايتەرەگىم،
كوڭىلىمە جارىق ساۋلە وي تەرەمىن.
200 جىل تاريحى بار ۇلگى ەتەرلىك،
وسى وڭىردە تۋماسام قايتەر ەدىم؟

تەر تامشىسى ماڭدايدان توگىلگەن تىم،
بەل مايىسىپ ەڭبەكتەن بۇگىلدى مىڭ.
قيىن-قىستاۋ كەزدەردىڭ ءدامىن تاتقان
سىر ەلى ءۇشىن ايتۋلى بۇگىنگى كۇن!

تاريحىڭ بار سىر شەرتەتىن ەجەلدەن،
تالاي جاۋhار شىققان وسى ۇلى ەلدەن.
قايتالانباس باتىرلارىڭ ءبىر توبە
قالىڭ جاۋعا اق نايزاسىن كەزەنگەن.

سەن بار جەردە راحات تاۋىپ جايلاندىم،
ءوزىڭ ءۇشىن قارۋىممەن سايلاندىم.
تۋعان ەلدىڭ ءتۇتىنىن تۇتەپ سوندىرمەي،
بايتاق جەرگە كىندىگىممەن بايلاندىم.

الار ورنى تاريحتىڭ زور ەمەس پە؟
ۇمىتپاستاي ساقتار ماڭگى ونى ەستە.
ءتىلىم ، ءدىنىم – ەلدىگىمنىڭ تىرەگى
سول ارقىلى ۇمتىلامىز بەلەسكە.

سەندە تۋعان جانقوجا باتىر بابام،
قىل قوبىزىن كۇڭىرەنتكەن قورقىت دانام.
تۋعان جەرىن قىزعىشتاي قورعاپ وتكەن،
ءجالاڭتوس باhادۇردەي باتىر بالاڭ.

سوناۋ تاريح جولىندا باستاماسى،
سول كەزدەردەن اشىلدى داستان باسى.
قىزىلورداداي شاhاردى ماقتان ەتەم،
ەلىمىزدىڭ العاشقى استاناسى!

سۇلۋلىعى تامساندىرار تالايدى،
كەڭ الەمگە شۋاق شاشار ارايلى.
سىر ەلى دەپ ، جىر ەلى دەپ ءتاۋ ەتىپ،
تۋعان حالقىڭ قاسيەتىنە بالايدى.

جايناعان سىر ەلىنە قاراعان كوپ،
باقىتتىڭ باستاۋىنا بالاعان تەك.
سان قيلى تاريحى مول تۋعان جەردىڭ،
كيەلى توپىراعىنان تاراعان ەك.

كوركەم نەتكەن بايتاق ەلدىڭ دالاسى،
جەرىن سۇيگەن مەن قازاقتىڭ بالاسى.
وركەندەي بەر،كوركەيە بەر ماڭگىلىك،
سىر الاشتىڭ قاسيەتتى اناسى!

 

 

اۋىلىم – التىن بەسىگىم

قازالىنىڭ كاۋكەي ەلدى مەكەنى،
قۇمىڭ – توسەك،جاسىل-جەلەك ەتەگى.
ءاربىر پەرزەنت تۋىپ وسكەن اۋىلىن،
ماڭگىلىككە ماقتان ەتىپ وتەدى.

تاڭ نۇرىمەن اجارىن جاساندىرىپ،
تالايلاردى ءتانتى ەتىپ،تامساندىرىپ.
اۋىلىمنىڭ كەلبەتى كوز تارتادى
ءور بويىنا جاراسىپ اساۋ قىلىق.

بولعان سوڭ قازاق رۋحى قانىمىزدا،
ەلدى ۇمىتۋ سىن بولار ارىمىزعا.
تۋعان جەردىڭ تاريحىنان سىر شەرتەمىز
تاۋبە ەتىپ،تاۋەلسىزدىك تاڭىمىزعا.

كونەلەردەن سىر شەرتكەن مۇڭعا بالاپ،
اۋىل – تىلسىم،كەرەمەت تۇڭعان الاپ.
كيەلى ءوڭىر تاريحى شەجىرەلى،
باسىمدى يەم،قاستەرلەپ شىڭعا بالاپ.

قوس عاشىقتىڭ كۋاسى ساراماننان،
وت جانارىن الا المايدى قاراعان جان.
ونەرلى،ورەندەرى توپ جارىپ ءجۇر،
كيەسى بويىمىزعا تاراعاننان.

اۋاسى تۋعان جەردىڭ شيپا جانعا،
ءنار بەرەر جۇرەكتەگى قۇيعان قانعا.
ايالى الاقاننىڭ ءدارۋى مول،
جازىلار جان جاراسى سيپاعاندا.

قاسيەتتى تۋعان جەر توپىراعىڭ،
ۋىسىما الامىن تولتىرامىن.
مىڭ قايتارا ءتاۋ ەتەم ماڭدايىما،
وركەن جايىپ ءوسسىن دەپ جاپىراعىن.

قۋ تىرشىلىك بىرتىندەپ قيىندادى،
كوكەيىمنەن كەتپەس ءبىر ءتۇيىن-داعى.
كەشە كوشكەن بىزدەردەن اۋىلىمنىڭ
تۋعان جەردەن توپىراق بۇيىرمادى.

پىكىرلەر