اراب تىلىندە تۇركى سوزدەرى دە كوپ. بىراق 70 پايىز ەمەس، ارينە. ادام بالاسىنىڭ الميساقتان بەرى ارالاسىپ-قۇرالاسۋى تىلدەردىڭ ءوزارا ىقپالداسۋىنا، تۋىسۋىنا اسەر ەتكەن. بۇل - انىق جايت.
ۇلى دالادان ءۇندى، اراب ايماعىنا، كارى قۇرلىققا قاراي باستالعان ميگراتسيا تەگى، ءتۇبى تۇركى بوپ شىعاتىن قاۋىمنىڭ اسسيميلياتسياعا ۇشىراۋىنا ىقپال ەتىپ وتىرعان. ءسويتىپ ادامنىڭ ساناسى، سالت-ءداستۇرى، دۇنيەتانىمى، ءتۇر-كەلبەتى وزگەرىسكە ۇشىراعان. تەك وزگەرمەيتىن قۇبىلىس - جاد. ياعني، كود. مەن كەيدە اتاعى الىستان ەستىلگەن عۇلاما عالىمداردىڭ نەگىزى تۇركى مە دەپ تە ويلايمىن. مەنىڭ بۇل ويىم بار جاقسىنى مەنشىكتەپ الۋ ەمەس، قيسىن، "وسىلاي دا بولۋى مۇمكىن-اۋ" دەگەن بولجامدى پايىم.
مۇنداعى ايتپاعىم: انا ءبىر “ۋاعىزشىنىڭ "قازاق ءتىلىنىڭ 70 پايىزى ارابتىكى” دەگەنىنە كەلىپ تىرەلەدى.
بولدى ەندى، جەتەدى! "كينو اياقتالدى", جىگىتتەر! قازاقتىڭ جۇيكەسىن جۇندەي ءتۇتىپ، قاجاي بەرۋدىڭ قاجەتى جوق. بۇدان ارى قاراي قاجالا بەرسە، قازاق ۇلتىنىڭ جۇيكەسى شىداس بەرمەي، تۇتاس حالىق ۇساقتالىپ، توبىرعا اينالىپ كەتۋى مۇمكىن. سوندىقتان ءداستۇرلى باق-تان باستاپ بارلىق الەۋمەتتىك پلاتفورمالاردان ساندىراق ءسوز بەن سۇحباتتارعا زاڭدى تۇردە تيىم سالىنۋى كەرەك. ءدىن جايىندا سويلەسە، ءدىن بىلگىرلەرى، تەولوگتار عانا سويلەسىن. يۋتۋب پەن تيكتوكتان شىعىپ الىپ، لاعىپ وتىراتىنداردىڭ اۋزدارىن جاپقان ابزال. قمدب ۇسىنىس جاساسىن، ءتيىستى ورىندار ءتيىستى شارالاردى قولعا السىن. ايتپەسە، مۇنىڭ اقىرى، جامان ايتپاي جاقسى جوق، سۇمدىق بولادى.
