"اق جول" پارتياسىنىڭ رەسمي سايتىندا ۇقك پارتيا توراعاسىنىڭ ورىنباسارى دميتري ۆاسيلەۆتىڭ ۇستالۋىنا قاتىستى رەسمي حابارلاما جاريالاندى، دەپ حابارلايدى "ادىرنا" ۇلتتىق پورتالى.
وندا جاعدايدىڭ پارتياداعى قىزمەتىنە ەش قاتىسى جوق ەكەنى جازىلعان.
"اپتا سايىن دەرلىك شەنەۋنىكتەر مەن ولاردىڭ سىبايلاستارىنىڭ تۇلعالاردىڭ ۇستالعانى تۋرالى حابارلار جاريالانعانىمەن، ادەتتە ولاردىڭ پارتيالارعا قاتىستىلىعىنا ەشكىم نازار اۋدارمايدى. ال، ءدال وسى ماسەلەدە اقپارات ساياسي تۇرعىدان كورسەتىلىپ بەرىلگەن، الايدا، بۇل قاماۋعا الۋدىڭ د.ۆاسيلەۆتىڭ پارتياداعى قىزمەتىنە ەش قاتىسى جوق. د.ۆاسيلەۆ شىنىمەن دە پارتيا توراعاسىنىڭ ءىرى بيزنەسپەن جۇمىس جونىندەگى ورىنباسارى. ول ءتۇرلى سالادا بىرنەشە جوبانى جۇزەگە اسىرىپ جۇرگەن ءىرى كاسىپكەر ءارى ينۆەستور" دەلىنگەن حابارلامادا.
ۆاسيلەۆتىڭ شتاتتان تىس جۇمىس ىستەيتىنى جانە ونىڭ جۇمىستان تىس ۋاقىتىندا نەمەن اينالىساتىنى جايلى ناقتى اقپاراتتىڭ جوقتىعى ايتىلدى.
"ول پارتيادا قوعامدىق (شتاتتان تىس) جۇمىس ىستەپ، تەك ۇيىمداستىرۋ شارالارىنا كەلەتىندىكتەن، بىزدە ونىڭ پارتيادان تىس ىسكەرلىك قىزمەتى مەن ۇستالۋىنىڭ ءمان-جايى تۋرالى تولىق مالىمەت جوق. جوعارىدا اتالعان حابارلامالار پايدا بولعان سوڭ، وتكەن جۇمادا (6.09) پارتيا توراعاسى ءمان-جايدى ءتۇسىندىرىپ، د.ۆاسيلەۆتىڭ ادۆوكاتىنىڭ مالىمەتتەرىن بەرۋدى سۇراپ، ۇلتتىق قاۋىپسىزدىك كوميتەتىنە رەسمي ساۋال جولدادى. كەشە (10.09) ونىڭ ۇستالۋ فاكتىسىن راستايتىن جاۋاپ كەلىپ، ادۆوكاتتارىنىڭ مالىمەتتەرى بەرىلدى. ءبىزدىڭ زاڭ قىزمەتىمىز شاعىمداردىڭ ءمانىن ءتۇسىنۋ ءۇشىن جاقىن ارادا ولارمەن بايلانىسادى (ازىرشە، مۇنداي شارالار جاۋاپسىز قالىپ وتىر)" دەپ قوستى پارتيا ءباسپاسوزى.
سونداي-اق، حابارلامادا ۆاسيلەۆتىڭ كىناسى دالەلدەنبەيىنشە ونىڭ كىناسىز سانالاتىنى، ءىستىڭ ماڭىزدى شەشىمدى قاجەت ەتەتىنى ايتىلعان:
"قۇقىق قورعاۋ ورگاندارىنىڭ سىبايلاس جەمقورلىقتى جويۋ جونىندەگى جۇمىسىن تۇبەگەيلى قولداي وتىرىپ، كەز كەلگەن قۇقىق بۇزۋعا قارسى كۇرەستە ادىلدىك پەن قۇقىقتىق مەملەكەت قاعيداتتارىن باسشىلىققا الۋ ماڭىزدى دەپ ەسەپتەيمىز. اتاپ ايتقاندا، قۇقىقتىق مەملەكەتتىڭ ماڭىزدى ءپرينتسيپىنىڭ ءبىرى – كىناسىزدىك پرەزۋمپتسياسى – تۇلعا ونىڭ كىناسى زاڭدى كۇشىنە ەنگەن سوت شەشىمىمەن دالەلدەنبەيىنشە كىناسىز سانالادى (قر كونستيتۋتسياسىنىڭ 77-بابى). سونىمەن قاتار، ازىرشە ناقتى ەشبىر اقپارات بولماسا دا، بىرقاتار فاكتىلەردى ءتۇسىنۋ قاجەت. مىسالى، د. ۆاسيلەۆكە قر قك 367 بابى تاعىلىپ وتىر (لاۋازىمدى تۇلعاعا پارا بەرۋ), الايدا، بىزگە ناقتى ءمان-جايلار بەلگىسىز، مىسالى، د.ۆاسيلەۆ پارا الۋدىڭ باستاماشىسى بولدى ما، الدە، كەرىسىنشە، تۇلعانىڭ بوپسالاۋ قۇربانى ما؟ بۇل جايتتىڭ شەشۋشى ماڭىزى بار، سەبەبى سول قر قك 367-بابىنا سايكەس «پارا بەرگەن ادام، ەگەر وعان قارسى پارا بوپسالاۋ ورىن السا، قىلمىستىق جاۋاپكەرشىلىكتەن بوساتىلادى». ارينە، قاماۋعا الۋ فاكتىسىنىڭ ءوزى تەرگەۋ تاراپىنان د.ۆاسيلەۆكە قاتىستى ماڭىزدى تالاپتىڭ بار ەكەنىن كورسەتەدى. بۇل رەتتە بيىل كوكتەمدە «اق جول» فراكتسياسىنىڭ دەپۋتاتتىق ساۋالىنان كەيىن، قاراعاندى وبلىسىنداعى او "قازتەمىرترانس" شەنەۋنىكتەرىنە بىرنەشە جىل بويى پارا بەرۋگە ءماجبۇر بولعان 15 كاسىپكەر ايىپتاۋعا قاراماستان، قىلمىستىق كودەكستىڭ ءدال وسى بابىنىڭ نەگىزىندە سوت زالىندا بوساتىلعانىن مىسال رەتىندە كەلتىرۋگە بولادى (https://t.me/peruash/11056 ). وزگە دە بىزگە بەلگىسىز جاعدايلار بولۋى مۇمكىن، سوندىقتان، د.ۆاسيلەۆكە قاتىستى جاعداي ادۆوكاتتارىنىڭ ماسەلەنى ەگجەي-تەگجەيلى زەرتتەۋىن تالاپ ەتەدى، ولارمەن جاقىن ارادا بايلانىسامىز دەپ ۇمىتتەنەمىز. "اق جول" دەمپارتياسى تاعىلىپ وتىرعان ايىپتاۋدىڭ اۋىرلىعىن ەسكەرە وتىرىپ، د.ۆاسيلەۆ ءىسى بويىنشا تەرگەۋ مەن سوتتىڭ بارىنشا اشىق بولۋىنا مۇددەلى. الايدا، ۇقك جاۋابىندا ايتىلعانداي، بۇل ءىس بويىنشا اقپارات الۋعا بەلگىلى ءبىر شەكتەۋ بار" دەپ تۇيىندەلدى پارتيا حابارلاماسى.
