بانكتەر اكتيۆتەردىڭ 53%-ىن (شامامەن 18 تريلليون تەڭگە) ەكونوميكا مەن ءوندىرىستى قارجىلاندىرۋدان گورى باعالى قاعاز تۇرىندە ۇستاۋدى ءجون كورەدى. بۇل تۋرالى "اق جول" قدپ توراعاسى ازات پەرۋاشەۆ ءماجىلىستىڭ وتىرىسىندا مالىمدەپ، بيىلعى جىلدىڭ 1 قىركۇيەگىندەگى قارجى نارىعىن دامىتۋ جانە رەتتەۋ اگەنتتىگىنىڭ مالىمەتتەرىن كەلتىردى دەپ حابارلايدى "ادىرنا" ۇلتتىق پورتالى.
"بيزنەس ءۇشىن تۇيتكىلدى ماسەلەنىڭ ءبىرى نەسيە رەسۋرستارىنىڭ قول جەتىمسىزدىگى مەن قىمباتتىعى بولىپ قالۋدا. ءبىز وسى كۇنگە دەيىن ۇلتتىق بانكتىڭ بازالىق مولشەرلەمەسىن تومەندەتۋ، ەكىنشى دەڭگەيلى بانكتەردىڭ پايىزىن تومەندەتۋ جانە بيزنەستى قولجەتىمدى قارجىلاندىرۋ قاجەتتىلىگىن تالاپ ەتىپ كەلەمىز، – دەدى دەموكراتتار فراكتسياسىنىڭ جەتەكشىسى. — ءبىزدىڭ فراكتسيا دەپۋتاتتارى بازالىق مولشەرلەمەنىڭ كوتەرىلۋى قازاقستاننىڭ ءوز ءوندىرىسىنىڭ تيىمسىزدىگىنە، يمپورتقا تاۋەلدىلىككە جانە ينفلياتسيالىق پروتسەستەردىڭ ۇلعايۋىنا الىپ كەلەتىنىن تالاي مارتە ايتقان ەدى، وسى جاعدايدى ءبىز بۇگىندە بايقاپ وتىرمىز. جاۋاپ رەتىندە بىزگە دەپوزيتتەر يەلەرىنىڭ مۇددەلەرىنە قىسىم جاسالعانى تۋرالى مالىمدەۋدە. بىراق شىن مانىندە، بۇگىندە بانكتەر نارىقتان تۇسكەن قاراجاتقا ەمەس، مەملەكەتتىك اقشاعا نەمەسە كۆازيمەملەكەتتىك كاسىپورىنداردىڭ قاراجاتىنا بيلىك ەتەدى".
ا.پەرۋاشەۆتىڭ ايتۋىنشا، جوعارى پايىزداردىڭ سالدارىنان نەسيە بويىنشا قارىز سوماسى اقىلعا قونىمدى مولشەردەن اسىپ كەتىپ، كاسىپورىنداردى رەيدەرلىك باسىپ الۋعا اكەلەدى، ال ناتيجەسىندە وتباسىلار بالالارىمەن بىرگە جالعىز باسپانالارىنان قۋىلىپ جاتادى.
سونىمەن قاتار، كاسىپكەرلەر اراسىندا قارىز الۋشىلاردىڭ تولەم قابىلەتتىلىگىنە نۇقسان كەلۋدە. بۇگىندە بانكتەر ەكونوميكانىڭ ناقتى سەكتورىن كرەديتتەۋدەن گورى، يمپورتتى كرەديتتەپ، ينفلياتسيانى ىلگەرىلەتە وتىرىپ، تۇتىنۋشىلىق كرەديتتەرگە كوشۋى كەزدەيسوق ەمەس. ويتكەنى، ەلدە اۋىرتپالىقسىز مۇلكى بار جانە قارىزدى وتەۋدە پروبلەمالارى جوق بيزنەس كۇننەن-كۇنگە ازايىپ جاتىر.
ءماجىلىپ دەپۋتاتىنىڭ پىكىرىنشە، قارجى نارىعىن رەتتەۋ اگەنتتىگىنىڭ دەرەكتەرى بويىنشا، بيىلعى جىلدىڭ 1 قىركۇيەگىندەگى جاعداي بويىنشا زاڭدى تۇلعالارعا، ياعني ەكونوميكاعا كرەديتتەرگە 20,6 % (نەمەسە 7,2 ترلن تەڭگە) باعىتتالدى، جەكە تۇلعالارعا بەرىلەتىن كرەديتتەرگە - 26,3% (9,2 ترلن تگ) ال بانك اكتيۆتەرىنىڭ 53%-ى باعالى قاعازدار تۇرىندە ورنالاستىرىلعان جانە ەكونوميكاعا جۇمىس ىستەمەيدى.
"مىنە، ۇلتتىق بانك ساياساتىنىڭ ناتيجەسى، بانكتەرگە ەكونوميكا مەن ءوندىرىستى قارجىلاندىرۋدان گورى اكتيۆتەردىڭ جارتىسىنان كوبىن قالىپتى دەڭگەيدە ۇستاۋ تيىمدىرەك بولادى", - دەدى ا. پەرۋاشەۆ.
"ادىرنا" ۇلتتىق پورتالى.
