قازاقستان رەسپۋبليكاسى ۇلتتىق ۇلانى «ورتالىق» وڭىرلىك قولباسشىلىعىنا قاراستى 5451 اسكەري ءبولىمىنىڭ اسكەري قىزمەتكەرشىلەرى استانادا ءوتىپ جاتقان اۋقىمدى شارا كەزىندەگى قىزمەت بارىسىندا قىراعىلىق تانىتتى.
9 قىركۇيەك كۇنى ەفرەيتور دىنمۇحاممەد سايلاۋ ءوزىنىڭ سەرىكتەستەرى ازامات قيزاتۇلى جانە دىنمۇحاممەت ابدىعاميتپەن بىرگە ەلوردا كوشەلەرىندە قوعامدىق ءتارتىپ پەن قاۋىپسىزدىكتى قامتاماسىز ەتۋگە شىعادى.
ساعات كەشكى 20.20 كەزىندە ولارعا 10 جاس شاماسىنداعى بالا كەلىپ، كومەك سۇرايدى. ونىڭ ايتۋىنشا، مەكتەپتەن شىققان سوڭ باسقا باعىتقا قاراي ءجۇرىپ، اداسىپ قالعان. اسكەري جاساق مۇشەلەرى بىرلەسە ارەكەت ەتۋ ارقىلى، بىردەن بالانىڭ اتا-اناسىن ىزدەۋگە كىرىسەدى. ارادا شامامەن 15 مينۋتتاي ۋاقىت وتكەندە، وقۋشىنىڭ اناسى تابىلدى.
بالاسىمەن ەسەن-ساۋ قاۋىشقان انا ۇلتتىق ۇلان ساربازدارىنا العىسىن ءبىلدىردى.
