قازاقستان پرەزيدەنتى قاسىم-جومارت توقاەۆ ءوز جارلىعىمەن بەلگىلى سينولوگ كونستانتين سىروەجكينگە راقىمشىلىق جاسادى، دەپ حابارلايدى "ادىرنا" ۇلتتىق پورتالى ساياساتتانۋشى اندرەي چەبوتارەۆتىڭ مالىمەتىنە سىلتەپ.
ساياساتتانۋشىنىڭ ايتۋىنشا، سىروەجكيننەن سوتتىلىق الىنىپ تاستالىپ، قۇقىقتارى قالپىنا كەلتىرىلگەن.
"پرەزيدەنت جانىنداعى راقىمشىلىق جاساۋ ماسەلەلەرى جونىندەگى كوميسسيانىڭ ۇسىنىسى بويىنشا مەملەكەت باسشىسى قاسىم-جومارت توقاەۆ ءتيىستى جارلىقپەن بەلگىلى عالىم-قىتايتانۋشى، ساياساتتانۋ عىلىمدارىنىڭ دوكتورى ءارى پروفەسسور كونستانتين سىروەجكينگە راقىمشىلىق جاسادى. وسىعان بايلانىستى ونىڭ سوتتىلىعى الىنىپ تاستالدى جانە ول ءوز قۇقىعىن قالپىنا كەلتىردى. جالپى، ادىلەتتىلىك ورنادى!"- دەپ جازادى چەبوتارەۆ.
سىروەجكين – تاريح عىلىمدارىنىڭ كانديداتى جانە ساياساتتانۋ عىلىمدارىنىڭ دوكتورى، ول قاماۋعا الىنعانعا دەيىن قازاقستاندا ءتۇرلى لاۋازىمداردى اتقارعان بولاتىن. ونىڭ ىشىندە قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى جانە تالداۋ ورتالىعىنىڭ باسشىسى بولدى.
سىروەجكين 2006 جىلدان باستاپ قازاقستان رەسپۋبليكاسى پرەزيدەنتىنىڭ جانىنداعى قازاقستان ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى بولىپ قىزمەت اتقاردى. ونىڭ «قىتايداعى قازاقتار: الەۋمەتتىك-ەكونوميكالىق جانە مادەني دامۋ وچەركتەرى»، «قازىرگى شىڭجاڭ جانە ونىڭ قازاق-قىتاي قاتىناستارىنداعى ورنى»، «قازاقستان-قىتاي: شەكارالىق ىنتىماقتاستىقتان ستراتەگيالىق سەرىكتەستىككە»، «قازاقستان؟ قورقۋ كەرەك» قىتاي: ميفتەر مەن فوبيالار» اتتى كىتاپتارى دا بار.
ەسكە سالا كەتەيىك، العاش رەت سىروەجكين 2019 جىلدىڭ 5 مامىرىندا ارىپتەستەرىمەن جانە تۋىستارىمەن بايلانىسىن توقتاتقانى بەلگىلى بولدى. 16 مامىردا ونىڭ "مەملەكەتكە وپاسىزدىق جاسادى" دەگەن كۇدىكپەن قامالعانى حابارلانعان.
4 ناۋرىزدا سىروەجكيننىڭ شارتتى تۇردە مەرزىمىنەن بۇرىن بوساتۋدان باس تارتقانى تۋرالى حابارلاعان بولاتىنبىز.
