قر پرەزيدەنتتىگىنە كانديدات مەيرام قاجىكەن الماتى قالاسىنا باردى. وندا ول سىبايلاس جەمقورلىققا قارسى ءىس-قيمىل تاقىرىبىندا وتكەن دوڭگەلەك ۇستەلگە قاتىستى. ءىس-شارانى كانديداتتىڭ الماتى قالاسىنداعى شتابى ۇيىمداستىردى.
قاتىسۋشىلار قاتارىندا قۇقىق قورعاۋ ورگاندارى مەن سىبايلاس جەمقورلىققا قارسى كۇرەس دەپارتامەنتىنىڭ وكىلدەرى، سەنىمدى وكىلدەر مەن قوعام قايراتكەرلەرى بار.
تاراپتار سىبايلاس جەمقورلىقتىڭ قازاقستاننىڭ الەۋمەتتىك-ەكونوميكالىق دامۋى كەرى اسەرىن، وسى قۇبىلىسقا قارسى ءىس-قيمىل جونىندەگى شەتەلدىك تاجىريبەنى تالقىلادى.
سىبايلاس جەمقورلىقتى قابىلداۋ يندەكسىنىڭ (CPI) حالىقارالىق رەيتينگىندە قازاقستان تومەنگى قاتاردا تۇر. 2021 جىلدىڭ قورىتىندىسى بويىنشا الەمنىڭ 180 ەلىنىڭ اراسىندا 102-ءشى ورىندا بولدى.
ەستەرىڭىزگە سالا كەتەيىك، وڭىرلەردەگى سايلاۋشىلارمەن كەزدەسۋلەردە مەيرام قاجىكەن اتاق-داڭقىنا، كىم ەكەنىنە قاراماي، سىبايلاس جەمقورلىققا قارسى كۇرەستى قاتاڭ جۇرگىزۋگە نيەتتى ەكەنىن بىرنەشە رەت اتاپ وتكەن بولاتىن. جيىندا كانديدات پاراقورلىقتىڭ، پارا بەرۋدىڭ، لاۋازىمدى تۇلعالاردىڭ وكىلەتتىكتەرىن اسىرا پايدالانۋدىڭ الدىن الۋ بويىنشا ماسەلەلەر كوتەرىلدى. ۇمىتكەر ناقتى زاڭدار مەن ەرەجەلەر قۋاتتى بولماسا قۇقىقتىق مەملەكەت قۇرۋ مۇمكىن ەمەس ەكەنىن ايتتى.
«قاتاڭ زاڭدار قاجەت. جانە ولار ءوز كۇشىندە ورىندالۋى كەرەك. سىبايلاس جەمقورلىق ارەكەتتەرى- ءار ادامنىڭ سانا سەزىمىنە، مادەنيەتىنە بايلانىستى. ال ونى جەڭۋ دە ءدال سولاي. تەك رەپرەسسيا ارقىلى سىبايلاس جەمقورلىقتى جويۋ مۇمكىن ەمەس. حالىققا ەسەپ بەرەتىن مىقتى اشىق ازاماتتىق قوعام قاجەت. ياعني مىقتى ازاماتتىق قوعام، تاۋەلسىز كاسىپوداقتار، كاسىپكەرلەر قاۋىمداستىعى جانە باسقا دا كوپتەگەن ۇيىمداردىڭ كۇشى بىرىگۋ كەرەك. سوندا ادامدار مەملەكەتتىڭ كەلىسىمشارتتارىن، بيۋدجەتتى، جەر ۋچاسكەلەرىن ءبولۋ ت.ب. ارەكەتتەردى باقىلاي الادى»، - دەدى م.قاجىكەن.
اڭگىمە بارىسىندا كانديدات «وكىنىشكە قاراي، بىزدە ازاماتتىق قوعام جوق» دەپ قوستى. ول تىعىرىقتان شىعۋدىڭ ءبىر جولى رەتىندە: كاسىپكەرلەر ۇلەسىنىڭ ۇلعايۋىن جانە مەملەكەتتىڭ ەكونوميكاعا قاتىسىن بارىنشا ازايتۋ دەپ سانايدى.
«مەملەكەت ۇلەسىن قالاي قىسقارتۋعا بولادى؟ مەملەكەتتىك ورگانداردى كوپتەگەن مىندەتتەردەن الشاقتاتۋ قاجەت. بيزنەستىڭ ءوزى-اق شەشىم قابىلداي الادى»، - دەپ ءتۇسىندىردى م.قاجىكەن.
قورىتىندىلاي كەلە، تاراپتار سىبايلاس جەمقورلىق، قۇقىق بۇزۋشىلىقتاردىڭ الدىن الۋعا ناقتى، ناتيجەلى باستامالار قاجەت دەگەن ورتاق پىكىرگە كەلدى. ياعني سىبايلاس جەمقورلىققا قارسى شارالار زاڭناما، سوت جانە قۇقىق قورعاۋ جۇيەلەرى سەكىلدى ءۇش نەگىزگى باعىتقا شوعىرلاندىرىلۋى ءتيىس.
