Qazaqstan Prezıdenti Qasym-Jomart Toqaev óz jarlyǵymen belgili sınolog Konstantın Syroejkınge raqymshylyq jasady, dep habarlaıdy "Adyrna" ulttyq portaly saıasattanýshy Andreı Chebotarevtiń málimetine siltep.
Saıasattanýshynyń aıtýynsha, Syroejkınnen sottylyq alynyp tastalyp, quqyqtary qalpyna keltirilgen.
"Prezıdent janyndaǵy raqymshylyq jasaý máseleleri jónindegi komıssııanyń usynysy boıynsha memleket basshysy Qasym-Jomart Toqaev tıisti jarlyqpen belgili ǵalym-qytaıtanýshy, saıasattaný ǵylymdarynyń doktory ári professor Konstantın Syroejkınge raqymshylyq jasady. Osyǵan baılanysty onyń sottylyǵy alynyp tastaldy jáne ol óz quqyǵyn qalpyna keltirdi. Jalpy, ádilettilik ornady!"- dep jazady Chebotarev.
Syroejkın – tarıh ǵylymdarynyń kandıdaty jáne saıasattaný ǵylymdarynyń doktory, ol qamaýǵa alynǵanǵa deıin Qazaqstanda túrli laýazymdardy atqarǵan bolatyn. Onyń ishinde Qazaqstan strategııalyq zertteýler ınstıtýty dırektorynyń orynbasary jáne taldaý ortalyǵynyń basshysy boldy.
Syroejkın 2006 jyldan bastap Qazaqstan Respýblıkasy Prezıdentiniń janyndaǵy Qazaqstan strategııalyq zertteýler ınstıtýtynyń bas ǵylymı qyzmetkeri bolyp qyzmet atqardy. Onyń «Qytaıdaǵy qazaqtar: áleýmettik-ekonomıkalyq jáne mádenı damý ocherkteri», «Qazirgi Shyńjań jáne onyń qazaq-qytaı qatynastaryndaǵy orny», «Qazaqstan-Qytaı: shekaralyq yntymaqtastyqtan strategııalyq seriktestikke», «Qazaqstan? qorqý kerek» Qytaı: mıfter men fobııalar» atty kitaptary da bar.
Eske sala keteıik, alǵash ret Syroejkın 2019 jyldyń 5 mamyrynda áriptesterimen jáne týystarymen baılanysyn toqtatqany belgili boldy. 16 mamyrda onyń "memleketke opasyzdyq jasady" degen kúdikpen qamalǵany habarlanǵan.
4 naýryzda Syroejkınniń shartty túrde merziminen buryn bosatýdan bas tartqany týraly habarlaǵan bolatynbyz.
