ءماجىلىس دەپۋتاتى، «اق جول» پارتياسىنىڭ جەتەكشىسى ازات پەرۋاشەۆ پارتيا توراعاسىنىڭ ورىنباسارى دميتري ۆاسيلەۆتىڭ ۇستالۋىنا قاتىستى پىكىر ءبىلدىردى، - دەپ حابارلايدى "ادىرنا" ۇلتتىق پورتالى.
دەپۋتات قاماۋعا الىنعانى تۋرالى اقپاراتتى كەشە عانا بىلگەنىن ايتتى.
"10 قىركۇيەكتە ۆاسيلەۆتىڭ ۇستالعانى تۋرالى رەسمي جاۋاپ الدىق. بىزگە ونىڭ ادۆوكاتتارىنىڭ بايلانىس دەرەكتەرىن بەردى، بىراق ءبىز ءالى ولارمەن بايلانىسقا شىعا الماي وتىرمىز. جاعدايدىڭ انىق-قانىعىنا تەك سول ادۆوكاتتارمەن سويلەسكەننەن كەيىن عانا جەتە الامىز. ال ازىرگە ۆاسيلەۆتىڭ قانداي باپ بويىنشا ۇستالعانى ناقتى بەلگىسىز", - دەدى پەرۋاشەۆ.
پارتيا توراعاسى رەسمي حات-حابارلاردان الدەبىر اقپارات تاراپ كەتىپ، سوعان بايلانىستى ۇلتتىق گۆارديانىڭ لاۋازىمدى تۇلعاسىنا «پارا الدى» دەگەن ايىپ تاعىلىپ وتىرۋى مۇمكىن دەگەن بولجام ايتتى.
"بۇل جەردە اڭگىمە ناقتى نە تۋرالى ەكەنىن ءتۇسىنىپ الۋ كەرەك. قىلمىستىق كودەكستىڭ 367-بابىنا سايكەس، پارا بەرۋگە ءماجبۇر بولعان تۇلعا قىلمىسكەر بولىپ سانالمايدى. سوندىقتان پارا بەرۋدى نەمەسە الۋدى كىم باستاعانىن ءتۇسىنۋ كەرەك، ۆاسيلەۆ پە، الدە ول بوپسالاۋدىڭ قۇربانى بولدى ما؟" - دەيدى پەرۋاشەۆ.
قوسا كەتەيىك، سوڭعى كەزدە «اق جول» پارتياسىنا قاتىستى ءتۇرلى وقيعالار بولىپ جاتىر. جاقىندا عانا پارتيا توراعاسى ازات پەرۋاشەۆ دەپۋتاتتىق مانداتىنان ايىرىلعان اسقار سادىقوۆتى پارلامەنتتە ىستەيتىن ايەلگە جىنىستىق بوپسا جاساعان دەپ ايىپتاعان بولاتىن. ەندى ءوزىنىڭ ورىنباسارى ۇستالدى. اسقار سادىقوۆ تا ءۇنسىز قالماي، «ازات پەرۋاشەۆ ءوزىنىڭ ورىنباسارىنىڭ ۇلتتىق گۆارديانىڭ گەنەرالىنا پارا بەرگەنى تۋرالى اقپاراتتى جاسىرىپ قالعىسى كەلىپ، اقپارات اۋانىن ماعان بۇرۋعا تىرىسقان سياقتى» دەگەن ويىن ايتتى.
