Májilis depýtaty, «Aq jol» partııasynyń jetekshisi Azat Perýashev partııa tóraǵasynyń orynbasary Dmıtrıı Vasılevtiń ustalýyna qatysty pikir bildirdi, - dep habarlaıdy "Adyrna" ulttyq portaly.
Depýtat qamaýǵa alynǵany týraly aqparatty keshe ǵana bilgenin aıtty.
"10 qyrkúıekte Vasılevtiń ustalǵany týraly resmı jaýap aldyq. Bizge onyń advokattarynyń baılanys derekterin berdi, biraq biz áli olarmen baılanysqa shyǵa almaı otyrmyz. Jaǵdaıdyń anyq-qanyǵyna tek sol advokattarmen sóıleskennen keıin ǵana jete alamyz. Al ázirge Vasılevtiń qandaı bap boıynsha ustalǵany naqty belgisiz", - dedi Perýashev.
Partııa tóraǵasy resmı hat-habarlardan áldebir aqparat tarap ketip, soǵan baılanysty Ulttyq gvardııanyń laýazymdy tulǵasyna «para aldy» degen aıyp taǵylyp otyrýy múmkin degen boljam aıtty.
"Bul jerde áńgime naqty ne týraly ekenin túsinip alý kerek. Qylmystyq kodekstiń 367-babyna sáıkes, para berýge májbúr bolǵan tulǵa qylmysker bolyp sanalmaıdy. Sondyqtan para berýdi nemese alýdy kim bastaǵanyn túsiný kerek, Vasılev pe, álde ol bopsalaýdyń qurbany boldy ma?" - deıdi Perýashev.
Qosa keteıik, sońǵy kezde «Aq jol» partııasyna qatysty túrli oqıǵalar bolyp jatyr. Jaqynda ǵana partııa tóraǵasy Azat Perýashev depýtattyq mandatynan aıyrylǵan Asqar Sadyqovty Parlamentte isteıtin áıelge jynystyq bopsa jasaǵan dep aıyptaǵan bolatyn. Endi óziniń orynbasary ustaldy. Asqar Sadyqov ta únsiz qalmaı, «Azat Perýashev óziniń orynbasarynyń Ulttyq gvardııanyń generalyna para bergeni týraly aqparatty jasyryp qalǵysy kelip, aqparat aýanyn maǵan burýǵa tyrysqan sııaqty» degen oıyn aıtty.
