Mäjılıs deputaty, «Aq jol» partiiasynyŋ jetekşısı Azat Peruaşev partiia töraǧasynyŋ orynbasary Dmitrii Vasilevtıŋ ūstaluyna qatysty pıkır bıldırdı, - dep habarlaidy "Adyrna" ūlttyq portaly.
Deputat qamauǧa alynǧany turaly aqparatty keşe ǧana bılgenın aitty.
"10 qyrküiekte Vasilevtıŋ ūstalǧany turaly resmi jauap aldyq. Bızge onyŋ advokattarynyŋ bailanys derekterın berdı, bıraq bız älı olarmen bailanysqa şyǧa almai otyrmyz. Jaǧdaidyŋ anyq-qanyǧyna tek sol advokattarmen söileskennen keiın ǧana jete alamyz. Al äzırge Vasilevtıŋ qandai bap boiynşa ūstalǧany naqty belgısız", - dedı Peruaşev.
Partiia töraǧasy resmi hat-habarlardan äldebır aqparat tarap ketıp, soǧan bailanysty Ūlttyq gvardiianyŋ lauazymdy tūlǧasyna «para aldy» degen aiyp taǧylyp otyruy mümkın degen boljam aitty.
"Būl jerde äŋgıme naqty ne turaly ekenın tüsınıp alu kerek. Qylmystyq kodekstıŋ 367-babyna säikes, para beruge mäjbür bolǧan tūlǧa qylmysker bolyp sanalmaidy. Sondyqtan para berudı nemese aludy kım bastaǧanyn tüsınu kerek, Vasilev pe, älde ol bopsalaudyŋ qūrbany boldy ma?" - deidı Peruaşev.
Qosa keteiık, soŋǧy kezde «Aq jol» partiiasyna qatysty türlı oqiǧalar bolyp jatyr. Jaqynda ǧana partiia töraǧasy Azat Peruaşev deputattyq mandatynan aiyrylǧan Asqar Sadyqovty Parlamentte ısteitın äielge jynystyq bopsa jasaǧan dep aiyptaǧan bolatyn. Endı özınıŋ orynbasary ūstaldy. Asqar Sadyqov ta ünsız qalmai, «Azat Peruaşev özınıŋ orynbasarynyŋ Ūlttyq gvardiianyŋ generalyna para bergenı turaly aqparatty jasyryp qalǧysy kelıp, aqparat auanyn maǧan būruǧa tyrysqan siiaqty» degen oiyn aitty.
Ūqsas jaŋalyqtar
