تۇرسىنبەكتى جاقتاۋشى كومپانيانىڭ ادامدارى مىناداي ساياسي لوزۋنگى شىعارىپتى:
«سۇرىنگەندى، بۇلىنگەندى ءسوز ەتپە،
مەن دە تۇرمىن، سەن دە تۇرسىڭ كەزەكتە»
مىناۋ شۋماقتىڭ استارىنا ۇڭىلسەڭىز، مەن دە، سەن دە قىلمىس جاساۋعا كەزەك كۇتىپ وتىرمىز دەگەنگە كەلەدى ەكەن. بىراق، وسى لوزۋنگتى ايتىپ وتىرعاندار قوعام مەن حالىقتى ادىلەت ىزدەمە، جەمقورلىققا كوز جۇما قارا، اق پەن قارانى اجىراتپا، ەرتەڭ سەنىڭ دە باسىڭا وسى كەلەدى دەپ باسىپ وتىرعان سياقتى. قازاق اڭقاۋ عوي، سەنە سالادى.
قازىر تۇرسىنبەكتىڭ جاقتاۋشىلارى كوبەيدى. ولاردىڭ قاتارىندا انشىلەر كوش باستادى. قازاق قوعامى سوڭعى 30 جىلدىڭ ىشىندە انشىلەردەن ء(بارى ەمەس) ەشبىر جاقسىلىق كورگەن جوق. قوعامدى، جاستاردى وزدەرىنىڭ جەكە باس تىرلىكتەرىمەن، جىلتىراقتارىمەن رۋحاني رەگرەسسكە ۇشىراتقان دا وسى انشىلەر بولدى.
ودان كەيىنگى ساپتا جالعان بلوگگەرلەر توقتاۋسىز جۇمىس ىستەپ جاتىر. بۇلاردىڭ دا قاتارى تىم كوپ. سوعان قاراعاندا تىم كوپ اقشا جۇمسالىپ جاتقان سياقتى.
ال، ءۇشىنشى قاتاردا قوعامنىڭ ىشىندەگى «كوپ ايتسا كوندى، جۇرت ايتسا بولدى» دەگەنگە شاپقىلايتىن توعىشار توبىرلار تۇر. ەڭ قاۋىپتى تەندەنتسيانى دا، قوعامدى وڭدىرماي جىبەرەتىن دە وسى توعىشار توبىرلار بولىپ تۇر.
وسىنىڭ ءبارىن ويلاي كەلە، ءبىزدىڭ قوعام زاڭ ۇستەمدىك قۇرعان جۇيەدە ەشقاشان دا ءومىر سۇرە المايدى دەگەن قورىتىندىعا كەلدىم. سەبەبى، قوعامنىڭ ءوزى جەمقورلىققا ابدەن ۇيرەنگەن. سىبايلاستىقتىڭ تالاي تۇرىنە بارا الادى ءبىزدىڭ قوعام. شارۋاسىن تەك وڭاي جولمەن شەشىپ كەتۋگە ەتى ءولىپ كەتكەن. ەگەر دە بىزدە زاڭ كۇشتى ۇستەمدىك قۇرسا، وندا قازاق قوعامىنىڭ ءومىر ءسۇرۋى قيىنداپ سالادى دەپ ويلاي بەرىڭىز.
تۇرسىنبەكتىڭ ءسوزىن جاپىرىلا، اقتارىلا سويلەپ جاتقان توعىشار توبىرلار تەستكە كىرىپ، قوساق اراسىندا كەتكەن قارشاداي قىزعا قيانات جاسالماسىن دەپ ءبىر دە ءبىر داۋىس كوتەرگەن جوق. سول قىزدىڭ تاعدىرى، ەرتەڭى نە بولسا ول بولسىن، بۇلارعا تۇرسىنبەك جاۋاپقا تارتىلماي، سىتىلىپ شىعىپ كەتسە بولدى. قارشاداي عانا قىز ەرىككەننەن بارعان جوق بۇل تىرلىككە. ونى دا تۇرمىستىڭ كۇيبەڭى جەپ بارا جاتقاندىقتان باردى. ول قىزدى دا مەن اقتامايمىن. تەك قانا تۇرسىنبەك دەپ ءولىپ-تالىپ جاتقان توبىرلاردىڭ قارشاداي قىزعا ءبىر ءسات جاناشىرلىق جاساپ، اراشا سۇراماۋى – بۇلاردىڭ ەسسىز، باسسىز، قۇلقىنىنان اسا المايتىن زۇلىم، جاعىمپاز ەكەنىنىڭ انىق كورىنىسى.
جەمقورلاردى اقتاپ، پاراقورلىققا بارماق باستى، كوز قىستىمەن قاراپ وتىرعان قوعامنىڭ قازىرگى سىيقى وسى.
بەكبولات قارجان،
"ادىرنا" ۇلتتىق پورتالى
