TÚRKI ARÝY
O, Túrkiniń arýy, kózderiń nur tógilgen,
Qara qasyń Qıǵash pa,
Shyrshyq pa?
Joq.
Kerýlen?!
Alma júziń aq shaǵyl, ıisiń ıran baqsha bir,
Batyp ólgen shaıyrmyn dıdaryńa seniń men!
O, Túrkiniń arýy, tisiń marjan tizilgen,
Qypsha beliń – qaýyrsyn, aqqýlardan úzilgen!
Eriniń – Taraz shıesi, Kún súıedi, men súıem,
Qara Ertis shashyńdy aımalaıdy qyzyl jel.
O, Túrkiniń arýy, hanshasyndaı handardyń,
Sansyz ásker ottary – kózderińde janǵan Kún.
Seni súıip qaldym men,
Fatımasy Muhtardyń,
Gúlbahramy Sákenniń,
Zylıhasy Maǵjannyń!
Saryarqanyń jýsany – demiń jupar ańqyǵan,
Júregińniń otyna párýanadaı sharpylam.
Júregimniń ústinde bıle túrki arýy,
Jaqyndasań tasımyn, alystasań sarqylam.
Seniń anaý burymyń baısaldy kósh, kerýen,
Seniń sóziń – aq almas, úshkir jebe, temiren.
Shabytyma darııa malyp qustar qanatyn,
Júregimnen ushady saǵan qaraı tobymen.
Aq mańdaıyń – Han Táńiri, kerme ıyǵyń – Alataý,
Aqsha betiń Ógelin begim kirgen aq otaý.
Seniń jibek mineziń, seniń jumsaq bilegiń,
Jelpı ushqan janymdy qońyr qazdyń qanaty-aý.
Qus jolyndaı qubylyp túımeleriń qatary,
Saǵan uqsap atqan tań, saǵan uqsap batady.
Kamzolyńdy qynaı bel, kóılegińdi qamajaı,
Tyrnalardyń tyraýy tystap bara jatady.
O, túrkiniń begimi, saǵan janym sadaǵa,
Seniń otty kózderiń jarqyraǵan samala.
Ertegiden, epostan shyǵa kelgen perızat,
Baı-baǵlanǵa burylma,
Qul-qutanǵa qarama.
Sákenderdiń sulýyn,
Maǵjandardyń ǵashyǵyn,
Elestetip kózime aldymnan shyq, asylym.
Júregime qon meniń, quz-jartasqa quldılap,
Júregimnen ush meniń, laǵyl qanat lashynym!
BIZ – KÓShPENDILERMIZ
Biz – kóshpendilermiz!
Ǵalamdy seldeı japyryp kóshken Ǵun-elmiz!
Qara qazannyń astynda qalǵan balany,
Qasqyr emizip, órteńnen ósken túmenbiz!
Biz – kóshpendilermiz!
Dúr dúnıeni áli ishteı seskendirermiz!
HHII ǵasyrdyń qaqpasynan da,
Jylqy jýsatyp,
Qoı jaıyp,
Qospen kirermiz!
Biz – kóshpendilermiz!
Aıdarymyzdan altyn jel esken dúr elmiz!
Eýropanyń túsine attyly túrk,
«Quj qalqyp, qola sapyrǵan» peshpen kirermiz!
Biz – kóshpendilermiz!
Babalar salǵan sara jol, kóshpen júrermiz.
Jún tútken áje.
Sur qumaı.
Oq jonǵan jigit.
Naryǵyńyzǵa nar minip keshteý kirermiz.
Biz – kóshpendilermiz!
Bir kisideı-aq dáýrendi keshken dúr elmiz.
Mańdaıymyzdy súıdirip kók Táńirine,
Arqamyzdy arýaq despen tirermiz!
Biz – kóshpendilermiz!
Ýaqyttan bálkim azyraq keshteý júrermiz.
Qymyz ashytyp,
Qyz qýyp,
Serke silkilep,
Tarpań tulpardyń basynan sheshken júgen – biz!
Biz kóshpendilermiz!
Biz kóshpendilermiz!
Mıras Asan
