قالا اكىمى عابيت سىزدىقبەكوۆ پەن «Alarko Holding» تۇرىك كومپانياسىنىڭ پرەزيدەنتى يىلدىز ۋميت نۋري «بوزارىق» يندۋستريالىق ايماعىندا قىزاناق وسىرەتىن ءىرى جىلىجاي كەشەنىنىڭ قۇرىلىس الاڭىنا كاپسۋلا سالۋ راسىمىنە قاتىستى. ينۆەستيتسيالىق جوبانىڭ قۇنى 650 ميلليون اقش دوللارىن، ونىڭ جالپى اۋماعى 650 گەكتاردى قۇرايدى.
جىلىجاي كەشەنى جىلىنا 155 مىڭ توننا ءونىم وندىرۋگە قاۋقارلى. جوبانىڭ ءبىرىنشى كەزەڭى پايدالانۋعا بەرىلگەننەن كەيىن 2 مىڭعا جۋىق جۇمىس ورنى قۇرىلىپ، تولىق ىسكە قوسىلعاندا 5 مىڭعا جۋىق ادام جۇمىسپەن قامتىلاتىن بولادى. وندىرىلگەن اۋىلشارۋاشىلىق ونىمدەرىمەن نەگىزىنەن، قالا تۇرعىندارى قامتىلىپ، تاۋارلار ەلىمىزدىڭ وزگە دە ايماقتارى مەن شەت مەملەكەتتەرگە جونەلتىلەتىن بولادى.
قالا اكىمى مەملەكەت باسشىسى قاسىم-جومارت توقاەۆتىڭ ينۆەستيتسيا تارتۋ جانە وسىمدىك شارۋاشىلىعىندا سۋدى ۇنەمدەيتىن وزىق تەحنولوگيالاردى ەنگىزىپ، دامىتۋ تاپسىرماسىن ىسكە اسىرۋ بارىسىندا بۇل جوبانىڭ ءرولى زور ەكەنىنە توقتالدى. اكىمدىك اۋقىمدى جوبالاردى جۇزەگە اسىرىپ جاتقان ينۆەستورلارعا جان-جاقتى قولداۋ كورسەتۋگە قاشان دا دايىن.
«جوبانى جۇزەگە اسىرۋ مەگاپوليستىڭ ازىق-تۇلىك قاۋىپسىزدىگىن قامتاماسىز ەتىپ، اۋىل شارۋاشىلىعىنىڭ تۇراقتى دامۋىنا جانە باعانىڭ تۇراقتالۋىنا ىقپال ەتەدى»، - دەدى قالا اكىمى.
كومپانيا قۇرىلىس ۋاقىتىن قىسقارتۋ ماقساتىندا شىمكەنتتە جىلىجاي سالۋعا ارنالعان كونسترۋكتسيالاردى شىعاراتىن زاۋىت اشۋدى كوزدەپ وتىر. سونىمەن قاتار، جوبا اياسىندا حالىقارالىق ستاندارت بويىنشا اۋىل شارۋاشىلىعى ماماندارىن دايىندايتىن مامانداندىرىلعان اكادەميا اشۋ جوسپارلانۋدا. اۋقىمدى جوبانى جۇزەگە اسىرۋ جىلىجاي شارۋاشىلىعىن دامىتۋعا عانا ەمەس، ازىق-تۇلىك قاۋىپسىزدىگىن قامتاماسىز ەتۋگە، جاڭا وندىرىستەردى ەنگىزۋگە جانە جاڭا جۇمىس ورىندارىن اشۋعا ىقپال ەتەدى.
