الەۋمەتتىك جەلىدە توميريس پاتشايىمنىڭ كيىمىن كيىپ، مەكتەپكە بارعان ەمشىنىڭ ۆيدەوسى تاراعان. بەينەجازبادا ەمشىنىڭ جامبىل وبلىسى تۇرار رىسقۇلوۆ اۋدانى تەرەڭوزەك اۋىلىنىڭ ورتاسىندا ۇرانداپ كەلە جاتقانى كورسەتىلگەن، دەپ حابارلايدى “ادىرنا” ۇلتتىق پورتالى.
باق-قا تاراعان اقپاراتقا سۇيەنسەك، ەمشى، “توميريس” ەسىمىمەن تانىمال بالگەر گۇلسارا سۋازقىزىنىڭ مەكتەپكە كەلىپ كەتكەننەن كەيىن داۋ تۋىنداعان. جەرگىلىكتى تۇرعىندار مۇعالىمدەردەن جينالعان اقشامەن وعان قۇرمەت كورسەتىپ، كۇتىپ العان.
تuraninfo.kz اقپارات كوزىنىڭ جۋرناليستەرى تەرەڭوزەك اۋىلدىق وكرۋگىنىڭ اكىمى قانات سماتقا قوڭىراۋ شالىپ، جاۋاپ العان.
“ول قوناقتاردى كۇتىپ الۋ، جاتار ورىنعا جايعاستىرۋ، داستارحان شىعىندارىنا اۋدان اكىمدىگىنىڭ دە، ءبىزدىڭ دە ەش قاتىسىمىز جوق” دەپ جاۋاپ بەرگەن اكىم.
گۇلسارا سۋازقىزى باستاپقىدا مەكتەپ ديرەكتورى زاكىمباەۆا ەلميراعا حابارلاسىپ، اۋىل تۇرعىندارىمەن قاتار، مەكتەپ وقۋشىلارىمەن كەزدەسكىسى كەلەتىنىن جەتكىزگەن.
29 تامىز كۇنى توميريسكە مەكتەپ تاراپىنان «تۋعان جەرگە تاعزىم» — «مەكتەپكە جول!» رەسپۋبليكالىق قايىرىمدىلىق اكتسيالارى اياسىندا ءىس-شارا ۇيىمداستىرىلعان. مەكتەپ باسشىلىعى جۋرناليستەرگە ۇستازداردان ەمشىنى كۇتىپ الۋ ءۇشىن اقشا جينالعانىن راستاعان.
گۇلسارا سۋازقىزى ءوزىن قر دەنساۋلىق ساقتاۋ سالاسىنىڭ ۇزدىگى، مەديتسينا عىلىمدارىنىڭ دوكتورى، پروفەسسور، ميشەل نوسترادامۋس اتىنداعى پروسكوپيا عىلىمدارىنىڭ اكادەميگى دەپ تانىستىرعان.
