باتىس قازاقستان وبلىسىنىڭ تابيعات قورعاۋ پروكۋرورى ابىلاي بيسقاليەۆ جەلىدە تاراپ كەتكەن ۆيدەودان كەيىن قىزمەتىنەن كەتتى، دەپ حابارلايدى“ادىرنا” ۇلتتىق پورتالى.
بقو پروكۋراتۋراسى 12 تامىز كۇنى Facebook-تە «قورشاعان ورتانى قورعايتىن پروكۋرور، قورشاعان ورتانى ءبۇلدىرىپ جۇرگەنى قالاي؟» دەگەن تاقىرىپپەن تاراعان فوتو-ۆيدەو بويىنشا قىزمەتتىك تەكسەرىس جۇرگىزگەن. انىقتالعانداي، ابىلاي بيسقاليەۆ جۇمىس ورنىندا بولعان. سول كۇنى جاسالعان مەديتسينالىق كۋالاندىرۋ پروكۋروردىڭ ساۋ بولعانىن كورسەتكەن.
«وبەكتيۆتى سەبەپتەرگە بايلانىستى فوتو-ۆيدەونىڭ ناقتى قاي كۇنى تۇسىرىلگەنىن انىقتاۋ مۇمكىن بولمادى. بىراق بۇل جاعداي قوعامدىق رەزونانس تۋعىزىپ، الەۋمەتتىك جەلى قولدانۋشىلارى مەن اقپارات سايتتارىنىڭ وقىرماندارى اراسىندا قىزۋ پىكىرتالاسقا ۇلاستى. ادەپ كودەكسىنە سايكەس، قۇقىق قورعاۋ ورگاندارىنىڭ قىزمەتكەرلەرى ازاماتتار، قوعام مەن مەملەكەت الدىنداعى جاۋاپكەرشىلىگىن سەزىنە وتىرىپ، مەملەكەتتىك بيلىك بەدەلىنە، ازاماتتار مەن قوعامنىڭ مەملەكەتتىڭ ينستيتۋتتارىنا دەگەن سەنىمىن نىعايتۋعا سەپتىگىن تيگىزۋى كەرەك، تەرىس قوعامدىق رەزونانس تۋعىزاتىن ارەكەتتەرگە جول بەرمەي، ءوز ابىروي-بەدەلىنە نۇقسان كەلتىرەتىن ارەكەتتەردەن اۋلاق ءجۇرۋى كەرەك»، - دەيدى پروكۋراتۋراداعىلار.
وسىعان بايلانىستى 15 تامىزدا قىزمەتتىك تەكسەرىستىڭ ناتيجەسى جانە وبلىس پروكۋراتۋراسىنىڭ ديستسيپلينارلىق كوميسسياسىنىڭ ۇسىنىمى بويىنشا ابىلاي بيسقاليەۆ قىزمەتكە تولىق ساي ەمەستىگى تۋرالى ەسكەرتۋ تۇرىندە تارتىپتىك جاۋاپقا تارتىلعان. الايدا بيسقاليەۆ مەملەكەتتىك قىزمەتكەرلەردىڭ مورالدىق-ەتيكالىق كەلبەتىنە جوعارى تالاپتار قويىلاتىنىن تۇسىنە وتىرىپ، باسشىلىقتىڭ اتىنا قىزمەتىنەن بوساتۋ تۋرالى راپورتپەن جۇگىنگەن. وسىلايشا 20 تامىزدا ابىلاي بيسقاليەۆ باتىس قازاقستان وبلىسى مامانداندىرىلعان تابيعات قورعاۋ پروكۋرورى قىزمەتىنەن بوساتىلعان.
ايتا كەتسەك، تامىزدا قازنەتتە وبلىستىڭ تابيعات قورعاۋ پروكۋرورى ابىلاي بيسقاليەۆ ماس كۇيىندە قالا كوشەلەرىمەن تەڭسەلە جۇرگەن ۆيدەوسى تاراعان. وسىدان كەيىن پروكۋروردىڭ ۇستىنەن قىزمەتتىك تەرگەۋ باستالعان.
2018 جىلعى 23 اقپاندا ابىلاي بيسقاليەۆ باتىس قازاقستان وبلىسى اقجايىق اۋدانىنىڭ پروكۋرورى بولىپ تاعايىندالعان.
قىزمەتتى 2003 جىلى اۋداندىق پروكۋروردىڭ كومەكشىسىنەن باستاعان. 2012 جىلى تەرەكتى اۋدانىنىڭ پروكۋرورى بولعان.
