Batys Qazaqstan oblysynyŋ tabiǧat qorǧau prokurory Abylai Bisqaliev jelıde tarap ketken videodan keiın qyzmetınen kettı, dep habarlaidy“Adyrna” ūlttyq portaly.
BQO prokuraturasy 12 tamyz künı Facebook-te «Qorşaǧan ortany qorǧaityn prokuror, qorşaǧan ortany büldırıp jürgenı qalai?» degen taqyryppen taraǧan foto-video boiynşa qyzmettık tekserıs jürgızgen. Anyqtalǧandai, Abylai Bisqaliev jūmys ornynda bolǧan. Sol künı jasalǧan medisinalyq kuälandyru prokurordyŋ sau bolǧanyn körsetken.
«Obektivtı sebepterge bailanysty foto-videonyŋ naqty qai künı tüsırılgenın anyqtau mümkın bolmady. Bıraq būl jaǧdai qoǧamdyq rezonans tuǧyzyp, äleumettık jelı qoldanuşylary men aqparat saittarynyŋ oqyrmandary arasynda qyzu pıkırtalasqa ūlasty. Ädep kodeksıne säikes, qūqyq qorǧau organdarynyŋ qyzmetkerlerı azamattar, qoǧam men memleket aldyndaǧy jauapkerşılıgın sezıne otyryp, memlekettık bilık bedelıne, azamattar men qoǧamnyŋ memlekettıŋ instituttaryna degen senımın nyǧaituǧa septıgın tigızuı kerek, terıs qoǧamdyq rezonans tuǧyzatyn äreketterge jol bermei, öz abyroi-bedelıne nūqsan keltıretın äreketterden aulaq jüruı kerek», - deidı prokuraturadaǧylar.
Osyǧan bailanysty 15 tamyzda qyzmettık tekserıstıŋ nätijesı jäne oblys prokuraturasynyŋ dissiplinarlyq komissiiasynyŋ ūsynymy boiynşa Abylai Bisqaliev qyzmetke tolyq sai emestıgı turaly eskertu türınde tärtıptık jauapqa tartylǧan. Alaida Bisqaliev memlekettık qyzmetkerlerdıŋ moraldyq-etikalyq kelbetıne joǧary talaptar qoiylatynyn tüsıne otyryp, basşylyqtyŋ atyna qyzmetınen bosatu turaly raportpen jügıngen. Osylaişa 20 tamyzda Abylai Bisqaliev Batys Qazaqstan oblysy mamandandyrylǧan tabiǧat qorǧau prokurory qyzmetınen bosatylǧan.
Aita ketsek, tamyzda Qaznette oblystyŋ tabiǧat qorǧau prokurory Abylai Bisqaliev mas küiınde qala köşelerımen teŋsele jürgen videosy taraǧan. Osydan keiın prokurordyŋ üstınen qyzmettık tergeu bastalǧan.
2018 jylǧy 23 aqpanda Abylai Bisqaliev Batys Qazaqstan oblysy Aqjaiyq audanynyŋ prokurory bolyp taǧaiyndalǧan.
Qyzmettı 2003 jyly audandyq prokurordyŋ kömekşısınen bastaǧan. 2012 jyly Terektı audanynyŋ prokurory bolǧan.
Ūqsas jaŋalyqtar
