4 قىركۇيەك كۇنى نۇرسۇلتان نازارباەۆتىڭ نەمەرە ءىنىسى قايرات ساتىبالدى بوستاندىققا شىقتى، دەپ حابارلايدى “ادىرنا” ۇلتتىق پورتالى.
قايرات ساتىبالدى سىبايلاس جەمقورلىق ءۇشىن 6 جىلعا سوتتالعان ەدى. سوت ونىڭ شارتتى تۇردە مەرزىمىنەن بۇرىن بوساپ شىعۋ تۋرالى ءوتىنىشىن قاناعاتتاندىردى.
جازاسىنىڭ قالعان 3 جىل 3 اي جانە 7 كۇن مەرزىمىن الماتىداعى پروباتسيالىق باقىلاۋدا وتكىزەتىن بولدى.
تۇرمەدەن شىققان اعاسىن ءىنىسى سامات ءابىش قارسى كۇتىپ الدى. وعان دا سوت 8 جىل شارتتى جازا تاعايىنداعان.
ەسكە سالا كەتەيىك، قايرات ساتىبالدى كىناسىن مويىنداپ، حالىق پەن پرەزيدەنتتەن كەشىرىم سۇراعان ەدى.
ايتا كەتسەك، قايرات ساتىبالدى 2022 جىلدىڭ ناۋرىز ايىندا «قازاقتەلەكوم» اق-نىڭ لاۋازىمدىق وكىلەتتىكتەرىن اسىرا پايدالاندى جانە قاراجاتىن اسا ءىرى مولشەردە ۇرلادى دەگەن كۇدىكپەن ۇستالىپ، قاماۋعا الىنعان. استانا قالاسى بايقوڭىر اۋدانىنىڭ №2 سوتى ونى مۇلكىن تاركىلەي وتىرىپ 6 جىلعا سوتتادى.
سونداي-اق بيىل تامىزدا قايرات ساتىبالدىنىڭ بۇرىنعى ايەلى گۇلميرا ساتىبالدىعا سوت ۇكىمى شىعىپ، 12 جىلعا باس بوستاندىعىنان ايىرىلعان بولاتىن.
