استاناداعى ۇلتتىق مۋزەي قورىنا ساق داۋىرىنە تيەسىلى التىن بۇيىمدار مەن ارتەفاكتىلەردىڭ بىرەگەي توپتاماسى بەرىلدى، دەپ حابارلايدى "ادىرنا" ۇلتتىق پورتالى Orda.kz-كە سىلتەپ.
بۇل جادىگەرلەر بۇرىن بەلگىسىز وليگارحتان تاركىلەنگەن بولاتىن. قۇندى تاريحي زاتتار قازاقستانعا قايتارىلعان اكتيۆتەردى باسقارۋ كومپانياسى ارقىلى مەملەكەتتىك مەنشىككە ءوتتى.
«قايتارىلعان اكتيۆتەردى باسقارۋ كومپانياسى» جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى قۋانىشبەك مۇقاشتىڭ ايتۋىنشا، قايتارىلعان اكتيۆتەر تەك ەكونوميكالىق ەمەس، مادەني يگىلىككە دە اينالۋى ءتيىس. بىراق اتالعان ارتەفاكتىلەردىڭ قايرات ساتىبالدىعا تيەسىلى ەكەندىگىن رەسمي راستاۋدان باس تارتتى.
ء"بىز زاڭ بويىنشا اكتيۆتەردىڭ يەسى تۋرالى مالىمەت بەرە المايمىز. بارلىق قايتارىلعان دۇنيە مەملەكەت مەنشىگىنە وتەدى، ال تاريحي قۇندىلىقتار مۋزەيلەرگە بەرىلەدى", — دەدى مۇقاش.
VII عاسىر ب.ز.د. مەن III عاسىر ارالىعىنا جاتاتىن بۇل ارتەفاكتىلەر ەجەلگى ساق-سكيف ءداۋىرىنىڭ «جانۋارلار ستيلىنە» ساي جاسالعان. ولار – ۇلى دالا وركەنيەتىنىڭ كوركەمدىك شەبەرلىگى مەن مادەني بايلىعىن دالەلدەيتىن سيرەك دۇنيەلەر.
مۋزەيگە مەتاللدان جاسالعان بۇركىت باسى، اراب جازۋىمەن ورنەكتەلگەن ساقينا، ءمۇيىزدى اڭ بەينەلەنگەن پلاستينا، قاناتتى ارىستان، قاناتتى ات، جۇگىرىپ كەلە جاتقان بارىس، سەكىرىپ تۇرعان بۇعى مۇسىندەرى، 15 كونە تيىن جانە ەكى ءسپيرالدى ساقينا جانە ارىستان باسى بەينەلەنگەن جۇزىك تابىستالدى.
جيناقتىڭ جالپى سالماعى 118 گراممنان اسادى. ساراپشىلار بۇيىمداردى دايىنداۋداعى ناقىشتاۋ، شەكىمە جانە گراۆيروۆكا سىندى ەجەلگى تەحنيكاعا تاڭدانىستارىن جاسىرماي وتىر.
باستاپقىدا بۇل بۇيىمداردى مەملەكەت مۇلكىن ساتۋ اۋكتسيونىندا ساتۋعا ارەكەت جاسالعان. الايدا باعالاۋشى ولاردىڭ تاريحي ماڭىزىن ەسكەرمەي، تەك التىن سالماعى بويىنشا ەسەپتەپ، اراب جازۋلى جۇزىكتى نەبارى 136 مىڭ تەڭگەگە باعالاعان.
بۇل بۇيىمداردىڭ ءبىر بولىگى بۇعان دەيىن قايرات ساتىبالدىدان تاركىلەنگەن ليۋكس ساعاتتار مەن اشەكەيلەر توپتاماسىنىڭ قۇرامىندا بولعان. سولاردىڭ ىشىندە Ulysse Nardin ساعاتىن ساتىبالدىنىڭ قولىنان ءبىر كەزدەگى رەسمي جيىندا بايقاۋعا بولاتىن ەدى. قازىر ول ساعات 7 ملن تەڭگەگە اۋكتسيونعا قويىلعان.
ۇقساس جاڭالىقتار
