سۆەتلانا نازارباەۆعا تيەسىلى «ءداۋىر» پوليگرافيالىق باسپا كەشەنى مەملەكەتتىك ساتىپ الۋ بويىنشا تاپسىرىس الۋدى جالعاستىرىپ كەلەدى. بۇل تۋرالى Halyq Uni. جاريالادى، دەپ حابارلايدى “ادىرنا” ۇلتتىق پورتالى.
قاماۋداعى نازارباەۆتىڭ نەمەرە ءىنىسى قايرات ساتىبالدىنىڭ اناسى سۆەتلانا نازارباەۆاعا قازاقستانداعى باسپالار اراسىندا مونوپوليسكە اينالعان «ءداۋىر» باسپاسى تيەسىلى.
“مەملەكەتتىك ساتىپ الۋ پورتالىنداعى اقپاراتقا سۇيەنسەك، باسپا اقپاننان ءبىر كوزدەن ساتىپ الۋ ءادىسى ارقىلى بەرى بىرنەشە تاپسىرىس الىپ كەلەدى.
ماسەلەن، بيىل اقپاندا «Alatau Akparat» جشس-مەن جالپى قۇنى 12 ملن تەڭگەدەن اساتىن ەكى كەلىسىمشارت جاساسقان”، دەلىنگەن اقپاراتتا.
ايتا كەتەيىك، قايرات ساتىبالدى 13 ناۋرىز كۇنى ۇستالعان بولاتىن. ول «قازاقتەلەكوم» اق قوماقتى قارجىسىن جىمقىردى جانە قىزمەتتىك وكىلەتىن اسىرا پايدالاندى دەگەن كۇدىككە ىلىنگەن. تەرگەۋ 24 تامىز كۇنى اياقتالدى.
“اناسى سۆەتلانا نازارباەۆاعا تيەسىلى «ءداۋىر» باسپاسى قايرات ساتىبالدى تەرگەۋدە جاتقان كەزدە دە، ياعني ناۋرىزدىڭ 31-ءى كۇنى قۇنى 61 ملن تەڭگە بولاتىن تاعى ءبىر تاپسىرىس العان.
تاپسىرىس بەرۋشى – «Alatau Akparat» جشس. ءدال وسى كومپانيامەن 5 مامىر كۇنى كەلىسىمشارتتى تاعى جالعاستىرعان. بۇل كەلىسىمشارت قۇنى – 53 ملن تەڭگەگە جۋىق.
تەحنيكالىق سيپاتتاماسىندا باسپانىڭ «ۆەچەرني الماتى» جانە «الماتى اقشامى» گازەتتەرىن باسىپ شىعارۋ ءۇشىن گازەت قاعازىن جەتكىزۋگە جانە قويمادان الماتىدا ورنالاسقان باسپاحاناعا جەتكىزۋ كەرەك دەپ كورسەتىلگەن” دەلىنگەن حابارلامادا.
سونىمەن قاتار، «ءداۋىر» باسپاسى ماۋسىم ايىندا مادەنيەت جانە سپورت مينيسترلىگىنىڭ تاپسىرىسىمەن تاعى بىرنەشە لوتتىڭ جەڭىمپازى اتانعان.
“قوعامدىق ماڭىزى بار ادەبيەتتى باسىپ شىعارۋ جانە تاراتۋ بويىنشا قىزمەت كورسەتۋگە جاسالعان ءۇش كەلىسىمشارتتىڭ جالپى قۇنى – 48 ملن 810 مىڭ تەڭگە بولادى. تەحسيپاتتاماسىندا كورسەتىلگەندەي، باسپا بارلىعى 8 قالامگەردىڭ كىتابىن باسىپ شىعارۋ جانە كىتاپحانالارعا تاراتۋ قىزمەتىن ىسكە اسىرادى. ال شىلدە ايىندا باسپا مەن مينيسترلىك تاعى بىرنەشە تاپسىرىستى ورىنداۋعا كەلىسىمشارت قۇرعان. 4 كەلىسىمشارتتىڭ جالپى قۇنى – 111 ملن تەڭگەدەن اسادى. مۇندا دا قوعامدىق ماڭىزى بار ادەبيەتتى باسىپ شىعارۋ جانە تاراتۋ بويىنشا بارلىعى 33 قالامگەردىڭ كىتابىن باسىپ شىعارادى” دەپ جازدى پورتال.
Halyq Uni ەسەبىنشە، بيىلدىڭ وزىندە قاڭتار-تامىز ارالىعىندا سۆەتلانا نازارباەۆاعا قاراستى قوس كومپانيا جالپى قۇنى 1 392 810 000 تەڭگەنىڭ مەملەكەتتىك تاپسىرىسىن العان.
وسىلايشا، قايرات ساتىبالدى قاماۋدا وتىرعانىمەن، وتباسىنىڭ ءجۇرىپ-تۇرۋىنا كەتەتىن شىعىنىن مەملەكەتتىك تاپسىرىستار ارقىلى ءوندىرىپ وتىرعان.
“ادىرنا” ۇلتتىق پورتالى
