جامبىل وبلىسىنىڭ 80 جىلدىعىنا «شاحريستان» كەشەنى اشىلادى

4564
Adyrna.kz Telegram

"شاحريستان" تاريحي-مادەني كەشەنى جامبىل وبلىسىنىڭ 80 جىلدىق مەرەيتويىنا دەيىن تولىعىمەن اياقتالىپ، پايدالانۋعا بەرىلۋى كەرەك. بۇل تۋرالى ايماق باسشىسى اسقار مىرزاحمەتوۆتىڭ توراعالىعىمەن وتكەن جيىندا ايتىلدى.
جيىندا «شاحريستان» كەشەنىنىڭ قۇرىلىس جۇمىستارىنا جاۋاپتى شتابتىڭ ەسەبى تىڭدالىپ، سالا ماماندارى اتقارىلىپ جاتقان جۇمىستار جونىندە باياندادى. اسقار يسابەكۇلىنىڭ ايتۋىنشا، كەشەننشەننڭ قۇرىلىس جۇمىستارى وتە باياۋ ءجۇرىپ جاتىر. سوندىقتان دا ايماق باسشىسى قۇرىلىس جۇمىستارىن جانداندىرا ءتۇسۋ كەرەكتىگىن سالا باسشىلارىنا مىقتاپ تاپسىردى. ناقتىراق ايتساق، كەشەننىڭ قۇرىلىس جۇمىسىن دەر كەزىندە اياقتاۋ ءۇشىن ەكى اۋىسىمدىق رەجيمگە جاڭا جۇمىس كەستەسى بەكىتىلىپ، 24 ساعات بويى تىنباي ەڭبەكتەنۋ قاجەت. ايتسە دە، ايماق باسشىسى جۇمىستى جانداندىرامىز دەپ، قۇرىلىستىڭ ساپاسىنا ءجۇردىم-باردىم قاراۋعا بولمايتىنىن ەسكەرتتى.
سونداي-اق، ءوڭىر باسشىسى جۇمىس قارقىنى ارتقان ساتتە تۋىندايتىن قۇرىلىسقا قاجەتتى ماتەريالداردى دەر كەزىنەدە جەتكىزىپ تۇرۋ وتە ماڭىزدى ەكەنىن ايتتى. سول سەبەپتى ول قۇرىلىس زاتتارىن ءوندىرۋشى كاسىپورىنمەن الدىن الا كەلىسىم-شارتقا وتىرىپ، جۇمىستى كىدىرتپەۋ كەرەك ەكەنىن ەسكەرتتى.
وبلىس باسشىسى «شاحريستان» تاريحي-مادەني كەشەنىنىڭ قۇرىلىسى كۇندەلىكتى ءوز باقىلاۋىندا ۇستايتىنىن جەتكىزىپ، جاۋاپتى ازاماتتارعا ناقتى تاپسىرمالار جۇكتەدى.
جالپى كولەمى 200 گەكتاردان استام اۋماقتى الىپ جاتقان «شاحريستان» كەشەنىندە كوركەم سۋرەت گالەرەياسى، مۋزەي، كورمە جانە رۋحانيات ورتالىعى، قولونەر شەبەرحاناسى، مەيرامحانا، سونىمەن قاتار امفيتەاتر جانە كولەمدى ساعات ستەللاسى سياقتى بىرنەشە نىسان بوي كوتەرەدى.
بۇدان بولەك، تاراز قالاسىنىڭ اكىمى قايرات دوساەۆ باعدارشامدار، جول بەلگىلەرى، جارىقتاندىرۋ، جول قوزعالىسى ماسەلەلەرى بويىنشا بايانداما جاسادى. قازىرگى تاڭدا تارازدا بارلىعى 1330 داڭعىل، كوشە، بۇرىلىس بولسا، ونىڭ 39 پايىزى اسفالتبەتوندى جولدار بولىپ سانالادى. ال قالانىڭ قالعان 61 پايىز جولى شاعال، توپىراقتى كوشەلەر. وسى ماسەلەنى شەشۋ ماقساتىندا وتكەن جىلى 500 ميلليون تەڭگە بولىنسە، بيىل 2,1 ميلليارد تەڭگە قاراستىرىلعان. اتالعان قارجىنىڭ 1 ميلليارد تەڭگەسى قالالىق بيۋدجەتكە، 1,1 ميلليارد تەڭگەسى وبلىستىق قازىناعا تيەسىلى.
اسقار يسابەكۇلى قالا ىشىندەگى جولداردىڭ ساپاسى سىن كوتەرمەيتىنىن اشىق ايتتى. تۇرعىنداردىڭ تالاپ-تىلەگىن ەسكەرىپ، جاڭا جولدار سالۋ كەرەكتىگىن تاپسىردى.

 

 

"ادىرنا" ۇلتتىق پورتالى

پىكىرلەر