"Shahrıstan" tarıhı-mádenı kesheni Jambyl oblysynyń 80 jyldyq mereıtoıyna deıin tolyǵymen aıaqtalyp, paıdalanýǵa berilýi kerek. Bul týraly aımaq basshysy Asqar Myrzahmetovtyń tóraǵalyǵymen ótken jıynda aıtyldy.
Jıynda «Shahrıstan» kesheniniń qurylys jumystaryna jaýapty shtabtyń esebi tyńdalyp, sala mamandary atqarylyp jatqan jumystar jóninde baıandady. Asqar Isabekulynyń aıtýynsha, keshennshennń qurylys jumystary óte baıaý júrip jatyr. Sondyqtan da aımaq basshysy qurylys jumystaryn jandandyra túsý kerektigin sala basshylaryna myqtap tapsyrdy. Naqtyraq aıtsaq, keshenniń qurylys jumysyn der kezinde aıaqtaý úshin eki aýysymdyq rejımge jańa jumys kestesi bekitilip, 24 saǵat boıy tynbaı eńbektený qajet. Áıtse de, aımaq basshysy jumysty jandandyramyz dep, qurylystyń sapasyna júrdim-bardym qaraýǵa bolmaıtynyn eskertti.
Sondaı-aq, óńir basshysy jumys qarqyny artqan sátte týyndaıtyn qurylysqa qajetti materıaldardy der kezinede jetkizip turý óte mańyzdy ekenin aıtty. Sol sebepti ol qurylys zattaryn óndirýshi kásiporynmen aldyn ala kelisim-shartqa otyryp, jumysty kidirtpeý kerek ekenin eskertti.
Oblys basshysy «Shahrıstan» tarıhı-mádenı kesheniniń qurylysy kúndelikti óz baqylaýynda ustaıtynyn jetkizip, jaýapty azamattarǵa naqty tapsyrmalar júktedi.
Jalpy kólemi 200 gektardan astam aýmaqty alyp jatqan «Shahrıstan» kesheninde kórkem sýret galereıasy, mýzeı, kórme jáne rýhanııat ortalyǵy, qolóner sheberhanasy, meıramhana, sonymen qatar amfıteatr jáne kólemdi saǵat stellasy sııaqty birneshe nysan boı kóteredi.
Budan bólek, Taraz qalasynyń ákimi Qaırat Dosaev baǵdarshamdar, jol belgileri, jaryqtandyrý, jol qozǵalysy máseleleri boıynsha baıandama jasady. Qazirgi tańda Tarazda barlyǵy 1330 dańǵyl, kóshe, burylys bolsa, onyń 39 paıyzy asfaltbetondy joldar bolyp sanalady. Al qalanyń qalǵan 61 paıyz joly shaǵal, topyraqty kósheler. Osy máseleni sheshý maqsatynda ótken jyly 500 mıllıon teńge bólinse, bıyl 2,1 mıllıard teńge qarastyrylǵan. Atalǵan qarjynyń 1 mıllıard teńgesi qalalyq bıýdjetke, 1,1 mıllıard teńgesi oblystyq qazynaǵa tıesili.
Asqar Isabekuly qala ishindegi joldardyń sapasy syn kótermeıtinin ashyq aıtty. Turǵyndardyń talap-tilegin eskerip, jańa joldar salý kerektigin tapsyrdy.
"Adyrna" ulttyq portaly
