باليعات جاستاعى قىز بالا ورامالمەن ءجۇرۋى كەرەك. بۇل تۋرالى باس ءمۇفتي ناۋرىزباي قاجى تاعانۇلى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
"نيكاب – بۇل ادامنىڭ بەتىن جاۋىپ تۇراتىن كيىم. ال شاريعات نيكابتى مىندەتتەمەيدى. شاريعاتتا نيكابپەن جۇرۋگە قاتىستى مىندەت جوق", - دەدى تاعانۇلى جۋرناليستەرگە بەرگەن سۇحباتىندا.
وسى ورايدا باس ءمۇفتى نيكاب سياقتى ءدىني كيىمدەرگە زاڭمەن تىيىم سالۋ ماسەلەسىنە قاتىستى ءوز ويىن دا ايتتى.
"نيكابتى زاڭمەن شەكتەۋ ماسەلەسىن زاڭ ورىندارى وزدەرى شەشەدى. ال ءبىز ءوز ناسيحاتىمىزدى ايتتىق، ءبىز زاڭ شىعارمايمىز، تەك مىناۋ بولادى، مىناۋ بولمايدى دەپ حالىققا تۇسىندىرەمىز. ارينە، ءبىز دە زاڭعا باعىنامىز. ءبىز حالىقتىڭ پايداسىنا شىعاتىن كەز كەلگەن زاڭعا باعىنامىز", - دەپ اتاپ كورسەتتى تاعانۇلى.
سونداي-اق، ول باليعات جاستاعى قىز ورامالمەن ءجۇرۋ كەرەگىن ايتتى.
“باليعات جاستاعى، اللاعا سەنگەن كەز كەلگەن قىز بالانىڭ ورامالمەن ءجۇرۋىن شاريعات مىندەتتەگەن. سوندىقتان باليعات جاستاعى قىز بالا ورامالمەن ءجۇرۋى كەرەك. ءبىز ونى وسىعان دەيىن دە ايتتىق. ناماز وقيتىن قىز بالا ورامالمەن جۇرگىسى كەلەدى. ونىڭ قۇقىعى نەگە شەكتەلۋى كەرەك؟»، - دەيدى باس ءمۇفتي.
ايتا كەتسەك، باليعات جاس قىز بالالاردا 9 جاستان، ۇل بالالاردا 13 جاستان باستالادى.
ەسكە سالساق، وسىعان دەيىن وقۋ-اعارتۋ ءمينيسترى عاني بەيسەمباەۆ مەكتەپ وقۋشىلارى مەكتەپ فورماسى كيۋ كەرەك دەگەن بولاتىن. مينيستر كونستيتۋتسيادا ەلىمىز زايىرلى بولىپ سانالعاندىقتان، مەكتەپ تە زايىرلى بولۋى كەرەگىن العا تارتقان ەدى.
