بۇگىن قر پرەزيدەنتى قاسىم-جومارت توقاەۆ قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعانۇلىن قابىلدادى، دەپ حابارلايدى اقوردا.
دەرەككوزىنە سۇيەنسەك، قازاقستان مۇسىلماندارى ءدىني باسقارماسى پاندەميا كەزىندە اۋرۋحانالارعا جاساندى تىنىس الۋ مەن وتتەگى اپپاراتتارىن، مەديتسينالىق قۇرال-جابدىقتار، مۇقتاج جاندارعا ءدارى-دارمەك جەتكىزىپ، مەشىتتەردىڭ جانىنداعى تىگىن تسەحتارىندا تىگىلگەن بەتپەردەلەر مەن قورعانىس كيىمدەرىن تەگىن تاراتقان. سونىمەن قاتار «ەل ۇلەسى – پاتەردە» اكتسياسى اياسىندا 314 باسپانا بەرىلگەن. باس ءمۇفتي پرەزيدەنتكە يمامداردىڭ ءبىلىمىن كوتەرۋ، كادر دايارلاۋ ماسەلەلەرى جايىندا بايانداعان.
«ناۋرىزباي قاجى تاعانۇلى قاسىم-جومارت توقاەۆقا ءمۇفتيات الداعى ۋاقىتتا «يحسان» ءىلىمىن، ابايدىڭ كەمەل ادام كونتسەپتسياسىن كەڭىنەن دارىپتەپ، ناسيحاتتاۋ جۇمىستارىمەن اينالىساتىنىن جەتكىزدى. كەزدەسۋ بارىسىندا قازاقستان مۇسىلماندارى ءدىني باسقارماسىنىڭ الداعى جوسپارلارى تۋرالى دا ءسوز بولدى. اتاپ ايتقاندا، يسلام اكادەمياسىن قۇرۋ، يسلام جانە تەولوگيا كىتاپحاناسىن سالۋ، ەلىمىزدەگى مەشىتتەردىڭ ارحيتەكتۋراسىن قازاقى سالت-ساناعا ساي قالىپتاستىرۋ ماسەلەلەرى ايتىلدى»، - دەپ حابارلايدى اقوردا.
كەزدەسۋ سوڭىندا پرەزيدەنت قاسىم-جومارت توقاەۆ قازاقستان مۇسىلماندارى ءدىني باسقارماسىنىڭ جۇمىسىن جوعارى باعالاپ، الداعى باستامالارىنا ساتتىلىك تىلەدى.
