فرانتسيا پروكۋراتۋراسى الەمگە ايگىلى دۋروۆقا 12 ءتۇرلى ايىپ تاقتى، دەپ حابارلايدى “ادىرنا” ۇلتتىق پورتالى.
ۆۆس مالىمەتىنشە، دۋروۆقا تاعىلعان ايىپتار: قۇزىرلى ورگاندارعا اقپارات بەرۋدەن باس تارتۋ، الاياقتىق پەن ەسىرتكى ساتۋعا قاتىسىنىڭ بولۋى، بالالاردىڭ پورنوگرافيالىق ۆيدەولارىن ساقتاۋعا، كيبەرقىلمىستارعا، اقشا جىلىستاتۋعا قاتىسۋى جانە ت. ب. بار.
پروكۋراتۋرا 8 شىلدەدە اشىلعان ءىستى كيبەرقىلمىسپەن كۇرەس ورتالىعى مەن ۇلتتىق الاياقتىقپەن كۇرەس باسقارماسى (ONAF) تەرگەپ جاتقانىن مالىمدەدى.
سونداي-اق، دۋروۆتى قاماۋ مەرزىمى 28 تامىزعا دەيىن ۇزارعان بولاتىن.
كەشە فرانتسيا پرەزيدەنتى ەممانۋەل ماكرون دۋروۆتىڭ ۇستالۋى «ساياسي شەشىم» ەمەستىگىن ايتقان ەدى.“ۇستاۋ مەرزىمىن تەرگەۋ سۋدياسى 25 تامىزدا ۇزارتتى جانە ۇيىمداسقان قىلمىسقا قاتىستى قىلمىستارعا قولدانىلاتىن ءتارتىپتى ەسكەرە وتىرىپ، 96 ساعاتقا دەيىن (ياعني 28 تامىزعا دەيىن) سوزىلۋى مۇمكىن”، — دەلىنگەن حابارلامادا.
ايتا كەتەيىك، تەلەگرامنىڭ نەگىزىن قالاۋشى پاۆەل دۋروۆ سەنبى كۇنى باكۋدەن فرانتسياعا جەكە ۇشاقپەن ۇشىپ كەلگەن. ول سول ساتتە قاماۋعا الىندى.“مەن پاۆەل دۋروۆ قاماۋعا الىنعاننان كەيىن فرانتسيا تۋرالى جالعان اقپاراتتى وقىپ جاتىرمىن. فرانتسيا ءسوز جانە كوممۋنيكاتسيا بوستاندىعىنا، يننوۆاتسيا مەن كاسىپكەرلىككە بۇرىنعىدان دا كوبىرەك ەركىندىك بەرگەن. سولاي بولىپ قالا بەرەدى”، — دەپ جازدى ماكرون X الەۋمەتتىك جەلىسىندە.
ۇقساس جاڭالىقتار
