فرانتسيا پارلامەنتى ەۆتانازيا تۋرالى زاڭدى قابىلدادى. بۇل تۋرالى Le Monde باسىلىمى جازدى، دەپ حابارلايدى «ادىرنا» ءتىلشىسى.
قابىلدانعان زاڭعا سايكەس، جازىلمايتىن اۋرۋدىڭ سوڭعى ساتىسىندا جاتقان، ەسىن بىلەتىن كامەلەتكە تولعان ناۋقاستار ءومىرىن توقتاتۋعا ارنالعان دارىلىك پرەپاراتتاردى قابىلداي الادى. بۇل دارىلەردى دارىگەر تاعايىندايدى جانە ول الدىن الا باسقا دارىگەرلەرمەن كەڭەسۋى ءتيىس.
كوپ جاعدايدا ناۋقاستار پرەپاراتتاردى وزدەرى قابىلدايدى. ەگەر ولاردىڭ دەنساۋلىق جاعدايى مۇنى جاساۋعا مۇمكىندىك بەرمەسە، دارىگەر نەمەسە مەدبيكە كومەك كورسەتەدى.
قۇجاتتى 291 دەپۋتات قولداپ داۋىس بەرسە، 241 دەپۋتات قارسى شىققان.
داۋىس بەرۋ قورىتىندىسىنان كەيىن فرانتسيا پرەزيدەنتى ەممانيۋەل ماكرون بۇل شەشىمنىڭ 2022 جىلى فرانتسۋز حالقىنا بەرگەن ۋادەسىنىڭ ورىندالعانىن ايتتى. ول زاڭ جوباسىن تالقىلاۋدى «سىندارلى ءارى قۇرمەتكە نەگىزدەلگەن پىكىرتالاس» دەپ باعالاپ، ءومىرىنىڭ سوڭعى كەزەڭىنە قاتىستى قيىندىقتارعا تاپ بولعان ادامداردىڭ كۋالىكتەرى قۇجات مازمۇنىنا اسەر ەتكەنىن اتاپ ءوتتى.
زاڭ قوعامدا جانە ساياسي ورتادا قىزۋ پىكىرتالاس تۋعىزعان ەدى. سولشىل پارتيالاردىڭ كوپشىلىگى مەن ماكروندى قولداۋشىلار باستامانى جاقتاسا، وڭشىل جانە اسىرە وڭشىل كۇشتەردىڭ وكىلدەرى قارسى بولعان. فرانتسيا ەپيسكوپتارىنىڭ كونفەرەنتسياسى زاڭنىڭ قابىلدانۋىن سىنعا الىپ، ونى «ەل تاريحىنداعى ەلەۋلى بەتبۇرىس» دەپ اتادى.
زاڭ كۇشىنە ەنگەننەن كەيىن فرانتسيا مۇنداي تاجىريبەگە رۇقسات بەرىلگەن ەلدەردىڭ قاتارىنا قوسىلادى. ولاردىڭ قاتارىندا بەلگيا، نيدەرلاند، شۆەيتساريا، كانادا جانە ۋرۋگۆاي بار.
