مال ازىعى نەگە اسپانداپ تۇر؟

1234

قر اۋىل شارۋاشىلىعى مينيسترلىگىنىڭ نازارىنا!

جايماشۋاق جاز دا ءوز مارەسىنە جەتىپ، قايمانا قازاق قاقاعان قىستى قارسى الۋعا قامدانىپ جاتىر. ەجەلدەن ءتورت-تۇلىكتى جانىنا سەرىك ەتكەن اۋىل حالقى وزىنەن بۇرىن مال-جاننىڭ قامىن جاساۋدى كوزدەيدى. ءبىر ۇيدە كەم دەگەندە 5 سيىر بار دەگەننىڭ وزىندە مالدىڭ اسپانداپ تۇرعان ازىعى اۋىلداعىلاردى ءبىراز ابىگەرگە سالارى انىق.

ماسەلەن، ناقتى كەلتىرىلگەن مالىمەتتەر كوزىنە سۇيەنسەك، جامبىل وبلىسى، جامبىل اۋدانى، اسا اۋىلىندا جوڭىشقانىڭ ءبىر باۋى باقانداي 400 تگ-ءنى قۇرايدى. بىلاي قاراساڭ اۋىز تولتىرىپ ايتارلىقتاي ەمەس، الايدا ءبىر سيىردىڭ ءوزى ءبىر كۇندە، ءبىر عانا باۋمەن شەكتەلىپ قالمايدى. اۋىلداعىلار بەس باس سيىرعا 400 تەڭگەدەن ءبىر قىستا 1000 باۋ (تۇك) ساتىپ الادى. ونى جيناۋى، اكەلۋى، جول پۇلى، قايتا ۇيگە تيەۋى تاعى دا اقشا. سوندا كەم دەگەندە 400 مىڭ تەڭگە كەتەدى ەكەن.

قىس قاتتى بولار دەگەن ساقتىقپەن، جوڭىشقانىڭ قاسىنا ارپا، بيداي، كەبەگىن تاعى قوسادى. بۇلاردىڭ دا باعاسى ءماز ەمەس. ارپا-66, بيداي-74 تەڭگە. ءبىر سيىر 50 كگدىقپەن 5 قاپ بيدايدى 18500 تەڭگەگە تۇتىنسا، 5 سيىرعا 92500 تەڭگەگە بيداي الىنادى ەكەن. سوندا قۇنى 200 مىڭنان اسپايتىن بەس ءىرى-قاراعا بۇلاي شىعىندانۋدىڭ قاجەتى قانشا دەپ ويلانىپ قالاسىڭ؟!

ءارى بۇل مالدار تەك جەم-شوبىمەن شەكتەلىپ قالسا جاقسى عوي، بۇدان بولەك ەكى-ءۇش اي سايىن ەكتىرۋى، ورىسكە بەرەتىن قاراجاتى، قاشىرۋى، اۋىرسا ءدارى-دارمەگى، قۇلاققا سالىناتىن ەنىنە دەيىن شارىقتاپ تۇر. اۋىلداعىلاردىڭ مالدان باسقا قىزىعى جوق ەكەنىن سەزگەن، ۆەتەرينالىق ءدارىحانادا دارىلەردى ۋداي باعاعا ساتادى. ناتيجەسىندە حالىق پايداسىنان بۇرىن، قىپ-قىزىل زيانىن تارتادى.

وسى ورايدا بىلگىشسىماقتار مالدىڭ ءسۇتى، ايرانى، قۇرتى قالا بەردى مايى بار ەمەس پە قالۋى مۇمكىن. ارينە، اقتىڭ بولعانى جاقسى، بۇلار ءبىر ۇيگە تولىعىمەن جەتەتىن شىعار. الايدا اۋىلدا قۇرت-مايدى ساتىلىمعا شىعارا المايسىن. سەبەبى ماڭايدىڭ ءبارى سيىر ۇستاعاندار. ال قالاعا بارىپ سالپاقتايمىن دەسەڭ، بىرنەشە ساعاتتىق جولعا شىداماي، اشىپ، ابىگەرگە سالۋى دا ىقتيمال. قىسقاسى، قالاي تارتساق تا مال ءوز-ءوزىن اقتامايدى.

وسىنىڭ بارىنەن بەيحابار ۇكىمەت، اۋىلدىڭ ءبىراز حالقىن 21 مىڭ تەڭگە ءۇشىن قورا-قورانى ارالاپ، مالدىڭ بارىن بىلسە، جەردەن جەتى قويان تاپقانداي بەرىلەتىن جاردەماقىدان شەكتەپ تاستاپ وتىردى. ودان بولەك قالانىڭ قاق تورىندە جىلى ورىندىقتا وتىرعاندار "اۋىل شارۋاشىلىعى نەگە دامىماي جاتىر" دەپ ۇراندايتىنى تاعى بار. ارينە، مال ازىعى قىمباتتاپ تۇرعان شاقتا اۋىل شارۋاشىلىعىنىڭ دامۋى نەعايبىل. كوپ ادامنىڭ مالدان قاشاتىن باستى سەبەبى دە وسى. مال ازىعى ارى قاراي دا ارزانداماسا اۋىل شارۋاشىلىعى اتىمەن جوعالۋى ابدەن مۇمكىن. سوندىقتان وسى ماسەلەنى قر اۋىل شارۋاشىلىعى  مينيسترلىگى نازارىنا الادى دەپ سەنەمىز.

اقگۇل ايداربەكوۆا

"ادىرنا" ۇلتتىق پورتالى

پىكىرلەر
رەداكتسيا تاڭداۋى