بۇگىن ۇكىمەت وتىرىسىنان كەيىن سۋ تاسقىنىنا بايلانىستى ءباسپاسوز ءماسليحاتى ءوتتى، دەپ حابارلايدى "ادىرنا" پورتالى.
جيىنعا «تاسقىن سۋعا تاس ءتۇيىن دايىنبىز» دەگەن توتەنشە جاعدايلار ءمينيسترى شىڭعىس ءارىنوۆ كەلمەي، ونىڭ ورىنباسارى باۋىرجان سىزدىقوۆ جاۋاپ بەردى. جۋرناليستەر ۆيتسە-مينيسترگە «ءسىز «قۇدايعا شۇكىر، ادام شىعىنى جوق» دەپ راحمەت ايتىڭدار دەگەن سەكىلدى ايتىپ وتىرسىز عوي. اباي وبلىسىنا قاراستى اياگوز اۋدانىندا تراكتوردىڭ ۇستىنە 10 ساعات وتىرىپ، ەكى ازامات سۋعا اعىپ كەتتى. قازىر ولاردىڭ دەنەسىن تابا الماي جاتىر. ون ساعات بويى قۇتقارۋعا بارا الماۋلارىڭىزدىڭ سەبەبى نەدە؟» دەپ سۇراق قويدى.
- بىرىنشىدەن، مەن ادام شىعىنى جوق دەپ ايتقان كەزدە، بىزگە راقمەت ايتىڭىزدار نەمەسە ماراپاتتتاڭىزدار دەگەن ماقساتتا ايتقان جوقپىن. مەن راقمەت الۋ ءۇشىن، حالىق العىس ايتسىن دەپ ايتپادىم. شۇكىر دەپ ايتۋ كەرەك دەپ شىن جۇرەكتەن ايتىپ وتىرمىن،- دەيدى ول.
- ەكىنشىدەن، تراكتوردەن ەكى ادامنىڭ جوعالۋى سۋ تاسقىنىنا بايلانىستى ەمەس. ونى ءبىز دۇرىس ءتۇسىنۋىمىز كەرەك. ولار جولدى قىسقارتۋ ءۇشىن تاسىپ جاتقان وزەنگە وزدەرى كىرىپ كەتكەن. دەمەك، ول سۋدىڭ ورتاسىندا بىردەن قالىپ كەتكەن جوق. ءوزى جولدى قىسقارتۋ ءۇشىن ءوزى كىرىپ وتىر. ءبىز دۇرىس ءتۇسىنۋىمىز كەرەك. “ون ساعات” دەپ ۇلعايتىلعان. ول جەردە ون ساعات وتكەن جوق. ورىسشا ايتقاندا “ۋ ستراحا گلازا ۆەليكي» دەيدى عوي. مىسالى، كوپ جەردە ءورت بولعان كەزدە، ازاماتتار ء“ورت ءسوندىرۋ كولىگى كەشىگىپ كەلىپ جاتىر” دەيدى. ال، شىندىعىندا ساناۋلى سەكۋندتار ءوتىپ جاتادى. بۇل جەردە دە سونداي نارسە. ءبىزدىڭ ول جەرگە كەش جەتكەنىمىزدىڭ سەبەبى، بۇكىل وزەندەردىڭ بويىمەن سۋلاردىڭ كوزدەرىندە ءبىزدىڭ قۇتقارۋشىلار تۇرعان جوق. وعان ۋاقىت كەرەك. سوندىقتان، ءبىز ول جەرگە ەڭ جاقىن جەردەگى قۇتقارۋشىلارىمىزدى جىبەردىك. سودان كەيىن، وسىنداي جاعداي بولدى، - دەيدى توتەنشە جاعداي ۆيتسە-ءمينيسترى باۋىرجان سىزدىقوۆ.
سونداي-اق ۆيتسە-مينيستر تىكۇشاقپەن قاۋىپتى ايماققا باراتىن كەزدە ۇشقىشتىڭ قاۋىپسىزدىگىن ويلاۋ كەرەك ەكەنىن ەسكەرتتى.
- مىسالى، ەگەر شەتەلدىك تاجىريبەنى الاتىن بولساق، ەۋروپادا ورتەنىپ جاتقان ءۇيدىڭ ىشىنە ءورت ءسوندىرۋىشى كىرمەيدى. ءبىرىنشى ول ءوزىنىڭ قاۋىپسىزدىگىن ويلايدى. تۇندە تىكۇشاقپەن ۇشقان ۇشقىشتىڭ قاۋىپسىزدىگىن دە ويلاۋىمىز كەرەك. ول جەردە قارا تۇنەك، ەشتەڭە كورىنبەيدى. وسىنداي قيىندىقتار بولىپ جاتىر. بۇگىنگى تاڭدا قۇتقارۋ جۇمىستار دەر كەزىندە اتقارىلىپ جاتىر، - دەگەن ۆيتسە-مينيستر ۇزاعىنان اقتالدى.
- ال، جاڭاعى ەكى كىسىنىڭ سۋعا كەتكەنى سۋ تاسقىنىنا بايلانىستى ەمەس. ءبىزدىڭ حالىق «وت پەن سۋ — ءتىلسىز جاۋ» دەيدى. ءبىز ءتىلسىز جاۋدىڭ بىرەۋى سۋ تاسقىنىمەن كۇرەسىپ جاتىرمىز. جازدا ورتپەن كۇرەسەمىز. ءتىلسىز جاۋمەن تەك قانا قۇتقارۋشىلار مەن مەملەكەتتىك ورگاندار كۇرەسپەۋى كەرەك. ءتىلسىز جاۋمەن ازاماتتارىمىز دا كۇرەسە ءبىلۋى قاجەت. ەگەر تاسىپ جاتقان سۋ بولسا، ءبىزدىڭ ازاماتتارىمىز ول سۋعا كىرمەۋ كەرەك. ونىڭ كۇرەسى سوندا. ەڭ ءبىرىنشى ادام ءوزىنىڭ قاۋىپسىزدىگىن ويلاۋ كەرەك. مەن ونى نەگە ايتىپ جاتىرمىن؟ ەرتەڭ قازاقستاننىڭ بولاشاعىن قۇراتىن جاستار مەن وسكەلەڭ ۇرپاق ونى دۇرىس ءتۇسىنۋى قاجەت. ولار تراكتورداعى ەكى ازامات سياقتى تاسقىنعا بارىپ كىرمەۋى كەرەك. سول ءۇشىن ايتىپ جاتىرمىن، - دەدى توتەنشە جاعداي ۆيتسە-ءمينيسترى باۋىرجان سىزدىقوۆ.
