Úkimet basshysy birqatar óńir ákimderiniń jumysyna syn aıtty, dep habarlaıdy "Adyrna" ulttyq portaly.
Úkimet otyrysynda jylytý maýsymyna daıyndyq barysy qaraldy. Nátıjesinde otyrysta premer-mınıstr Oljas Bektenov jylytý maýsymynyń bastalýyna bir aıdan sál astam ýaqyt qalǵanyn jáne basshylardyń kópshiligi daıyndyq týraly senimdi sóıleýge tyryssa da jumystyń nátıjeli bolatynyna sendirmeıtinin aıtty.
Premerdiń sózinshe, «Qarmet» kompanııasynyń 2-shi JEO-syndaǵy 2-shi qazandyqty jóndeý jumystary merziminde aıaqtalmaǵan. Onyń ústine 1-shi qazandyqty kúrdeli jóndeý sol kúıi bastalmaǵan. Al №7 qazandyqty jóndeý jumystary da bekitilgen kesteden keshigip jatyr.
"Bizdiń otyrystarymyz ben keńesterimizde oblys ákimderine osyndaı osal tustarǵa nazar aýdarý týraly birneshe ret aıtyldy. Sonymen qatar jóndeý naýqany kezinde táýekel týdyrýy múmkin naqty jaǵdaılardy atap kórsetip, shuǵyl sharalar qabyldaý qajettigi týraly tapsyrmalar da berildi. Alaıda, 3 aı ótti, baıaǵy jartas – sol jartas, ózgeris shamaly. Sol óńirler áli artta, sol baıaǵy keshiktirý, keıinge shegerý. Energetıka mınıstrligi kásiporyndarǵa jylytý kezeńine ázirlik pasporttaryn bere bastady. Jylý ortalyqtaryń ázirlik pasportyn berýden bas tartylǵan jaǵdaıda sol óńirlerde ákimderdiń jetekshilik etetin orynbasarlarynyń tikeleı jaýapkershiligi qaralatyn bolady", — dep atap ótti Oljas Bektenov.
Odan bólek, Oljas Bektenov kómir men mazýt jetkizý máselelerin qatań baqylaýda ustaýdy tapsyrdy.
Úkimet otyrysynda premer-mınıstr jaýapty mınıstrler men oblys ákimderiniń nazaryn stansalardy otyn qorymen qamtamasyz etýge aýdardy. Konkýrstyq rásimderdiń kesh ótkizilýine baılanysty suraqtar týyndap otyrǵany basa aıtyldy.
