جۇمىسقا تۇرماق بولعان اۋلا سىپىرۋشى 2 ميلليارد قارىز بولىپ قالدى

671

ماسكەۋ ماڭىنداعى ۆوسكرەسەنسك قالاسىنىڭ تۇرعىنى الاياقتاردىڭ ارباۋىنا ءتۇسىپ، ەكى ميلليارد رۋبل (شامامەن 11,8 ميلليارد تەڭگە) قارىز بولىپ قالعان.

ول "موسكۆا 24" تەلەارناسىنا بەرگەن سۇحباتىندا بالانى جالعىز تاربيەلەپ وتىرعانىن جانە قارىز بولۋىنا بايلانىستى جۇمىستان بوساتىلعانىن ايتتى.

"ولارعا حات كەلدى – سەبەبىن تاۋىپ، مەنى بىردەن جۇمىستان شىعارىپ جىبەردى. كۇيەۋىممەن بىرگە تۇرمايمىن، بالانى جالعىز تاربيەلەپ وتىرمىن. ادۆوكاتقا بارىپ، سوتقا ارىز بەردىم. ءۇيىمدى ءتىنتىدى. ءدارى-دارمەككە تاۋەلدى بولىپ قالدىم، جۇيكەم جۇقاردى", - دەدى بۇرىن كوشە تازالاۋشى بولىپ جۇمىس ىستەگەن ايەل.

ايەل بىرنەشە جىل بۇرىن جۇمىسقا ورنالاسپاق بولادى، اڭگىمەلەسۋ كەزىندە قۇجاتتاردىڭ مازمۇنىمەن تانىسپاستان قول قويىپ جىبەرەدى. ءسويتىپ اياق استىنان فيرمانىڭ قۇرىلتايشىسى بولىپ شىعا كەلگەن، ال ول فيرمانىڭ اتىنا قىلمىسكەرلەر كرەديت راسىمدەگەن.

جەرگىلىكتى اقپارات قۇرالدارىنىڭ مالىمەتىنشە، 2016 جىلى ماسكەۋدىڭ دوروگوميلوۆسكي سوتى ايەلدەن قارىزدى ءوندىرىپ الۋ تۋرالى شەشىم قابىلداعان. ەندى ول 1,82 ميلليارد رۋبل قارىزدى، سونداي-اق 127,4 ميلليون رۋبل اتقارۋشى الىمدى (سوت ۇكىمىن ءوز ەركىمەن ورىنداۋ مەرزىمىن ساقتاماعانى ءۇشىن سالىناتىن ايىپپۇل – Sputnik) تولەۋگە مىندەتتى.

ماسكەۋ وبلىسىنداعى ادام قۇقىقتارى جونىندەگى ۋاكىل ەكاتەرينا سەمەنوۆا ايەلگە قاتىستى جاعدايدى ءوز باقىلاۋىنا الدى.

 

"ادىرنا" ۇلتتىق پورتالى

پىكىرلەر