«التىن وردا» بازارىندا ساۋداگەرلەردەن زاڭسىز اقشا جيناعان پوليتسەيلەر سوتتالدى. بۇل تۋرالى قر سىبايلاس جەمقورلىققا قارسى ءىس-قيمىل اگەنتتىگى الماتى وبلىسى بويىنشا دەپارتامەنتىنىڭ باسشىسى سەرىك ورىمبەتوۆ مالىمدەدى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، وتكەن جىلدىڭ سوڭىندا پوليتسيا قىزمەتكەرلەرىنىڭ بازاردا زاڭسىز قىزمەتپەن اينالىسقانى بەلگىلى بولعان.
ولار لاۋازىمدىق وكىلەتتىگىن تەرىس پايدالانا وتىرىپ، «التىن وردا» بازارىندا جالپى قامقورلىعى جانە قىلمىستىق جانە اكىمشىلىك جاۋاپكەرشىلىكتەن الشاقتاتقانى ءۇشىن ساۋدا قىزمەتكەرلەرىنەن اقشا جيناۋدى ۇيىمداستىرعان.
وسىلايشا بازار اۋماعىندا الەۋمەتتىك شيەلەنىس تۋعىزعان.
«ايتا كەتۋ كەرەك، پوليتسەيلەردىڭ ءبىرى اتىس قارۋىن قولدانۋ ارقىلى انتيكور قىزمەتكەرلەرىنە قارسىلىق كورسەتتى. الماتى وبلىسى قاراساي اۋداندىق سوتىنىڭ ۇكىمىمەن 3 ۋچاسكەلىك پوليتسيا ينسپەكتورىنىڭ 3 جىل مەرزىمگە باس بوستاندىعى شەكتەلدى»،- دەيدى سەرىك ورىمبەتوۆ.
