ارحەولوگتار الماتى وبلىسىنىڭ تاۋلارىنان تاريح ءۇشىن قۇندى ەسكەرتكىشتەردى تاپتى، دەپ حابارلايدى “ادىرنا” ۇلتتىق پورتالى Tengrinews-قا سىلتەپ.
تاۋلى ايماقتا ارحەولوگتار ءۇش مىڭ جىل بۇرىن قولدانىلعان مالشىلار لاگەرىن زەرتتەپ، «تاس ۇيلەردى» تاپتى.
الكەي مارعۇلان اتىنداعى ينستيتۋتتىڭ ءبىر توپ ارحەولوگتارى الماتى وبلىسى جامبىل اۋدانىنداعى سەرەكتاس القابىندا كوپ جىلدان بەرى العاش رەت زەرتتەۋ جۇمىستارىن جۇرگىزدى. ناتيجەسىندە 2000 جىلداردىڭ باسىندا بەلگىلى ارحەولوگ الەكسەي مارياشەۆ سەرىكتاس قونىسىن، سونداي-اق جارتاستاعى سۋرەتتەردى اشقان.
ارحەولوگتاردىڭ سوزىنشە ۇزاق ۋاقىت بويى بۇل اۋماقتا قازبا جۇمىستارىن جۇرگىزۋگە قارجى تاپشى بولعان. الايدا، اعىمداعى جىلدىڭ شىلدە ايىندا كورشىلەس سەرىكتاس-2 ۋچاسكەسىندە جۇمىس باستالىپتى.
عالىمدار بۇل جەردە قولا داۋىرىنەن ورتا عاسىرلارعا دەيىن ءارتۇرلى تايپالار مەن ۇلتتار پايدالانعان قىستاۋ بولعانىن انىقتادى.
«دوڭگال تيپىندەگى ۇيلەردى قازدىق ارحەولوگيادا قولا داۋىرىندەگى بەعازى-داندىباەۆ مادەنيەتى بەلگىلى جانە سوعان بايلانىستى بولسا كەرەك، مۇندا ءومىر سۇرگەن ادامدار مال وسىرۋمەن اينالىسقان»، - دەيدى ەكسپەديتسيا جەتەكشىسى، عىلىم دوكتورى البينا ەرجانوۆا.
عالىمدار كونە ءۇيدىڭ ىشكى كورىنىسىمەن دە ءبولىستى.
"ىشىنەن ۇساق تاستارمەن قاپتالعان، سىرتى توپىراقپەن جابىلعان ۇلكەن تۇرعىن ءۇيدى قاراپ شىقتىق. ءىشى ءۇش بولمەگە بولىنگەن، ال بولمەنىڭ ورتاسىندا تاس وشاق بار. ارنايى جىلۋ جۇيەسى ورناتىلعان”، - دەپ اتاپ ءوتتى.
ۇيدەن توڭازىتقىشتىڭ انالوگى رەتىندە پايدالانۋعا بولاتىن ويىقتارى بار قوسالقى بولمە دە انىقتالدى. وندا ازىق-تۇلىك قورلارى ساقتالعان كورىنەدى.
ودان بولەك، ۇيدەن كەراميكا سىنىقتارى كوپتەپ تابىلدى. زەرتتەۋشىلەر كەراميكانىڭ وتە ساپالى جاسالعانىن اتاپ ءوتتى.
كوپتەگەن سۇيەك قالدىقتارىنا، سونداي-اق تەرى وڭدەۋگە ارنالعان تاس قۇرالدارعا سۇيەنە وتىرىپ، عالىمدار سەرىكتاس-2 قونىسىنىڭ تۇرعىندارى مال شارۋاشىلىعىمەن جانە قولونەرمەن اينالىسقان دەگەن قورىتىندىعا كەلدى.
