قازاقستاندا تاريحي ەسكەرتكىشتەردىڭ مازمۇندىق جانە ماعىنالىق ساپاسىن ارتتىرۋعا باعىتتالعان جۇيەلى جۇمىس قولعا الىنباق. بۇل تۋرالى 5 قىركۇيەكتە تانىمال مۇسىنشىلەرمەن كەزدەسكەن ۆيتسە-پرەزيدەنت ەرلان قارين مالىمدەدى، دەپ حابارلايدى “ادىرنا”.
ونىڭ ايتۋىنشا، بۇعان دەيىن ەسكەرتكىشتەردى ورناتۋ ءتارتىبىن رەتتەۋگە باسىمدىق بەرىلسە، ەندى ولاردىڭ قوعامدىق جانە ۇلتتىق ماعىناسىنا كوبىرەك كوڭىل بولىنەدى.
قاريننىڭ پىكىرىنشە، ەلىمىزدە ورناتىلىپ جاتقان ەسكەرتكىشتەر ۇلتتىق بىرەگەيلىكتى نىعايتىپ، قوعامعا ورتاق قۇندىلىقتاردى دارىپتەۋى ءتيىس.
«الداعى ۋاقىتتا تاريحي جادتى ساقتاۋ ماسەلەلەرىمەن جۇيەلى تۇردە اينالىساتىن بولامىز. وسىعان دەيىن ەسكەرتكىشتەردى ورناتۋدى رەتتەپ، تارتىپكە كەلتىردىك. ەندى ولاردىڭ ماعىنالىق، مازمۇندىق ساپاسىنا قاتىستى جۇمىستى باستايمىز. ويتكەنى، بارلىعىنا ورتاق ءبىر ۇستانىم كەرەك. وڭىرلەردە اشىلعان ەسكەرتكىشتەردەن جەرشىلدىك پەن قوعامداعى تاعى دا باسقا ءبىر كەسەلدەردىڭ بەلگىلەرى بايقالادى. شىن مانىندە، قانداي دا ءبىر ەسكەرتكىش، ءمۇسىن نەمەسە شاعىن ساۋلەت فورماسى بولسىن بەلگىلى ءبىر دەڭگەيدە ۇلتتىق بىرەگەيلىكتى دامىتۋعا، ورتاق قوعامدىق قۇندىلىقتاردى ورنىقتىرۋعا قىزمەت ەتۋى كەرەك»، – دەدى ۆيتسە-پرەزيدەنت.
ول بۇل باعىتتاعى كەمشىلىكتەردى تۇزەتۋ جۇمىستارى جۇيەلى ءارى تۇراقتى تۇردە جۇرگىزىلەتىنىن اتاپ ءوتتى.
سونىمەن قاتار ەرلان قارين ەسكەرتكىش ونەرىن دامىتۋعا قاتىستى ۇسىنىستارىن ورتاعا سالعان. تاراپتار وسى باعىتتا بىرنەشە جاڭا جوبا بويىنشا بىرلەسىپ جۇمىس ىستەۋگە كەلىسكەن.
